«Ինչո՞ւ այս իշխանություններին կուրորեն պաշտպանողները չեն վերադառնում հայրենիք». Արսեն Բաբայան

«Պատիվ ունեմ» դաշինքով առաջադրված պատգամավորի թեկնածու Արսեն Բաբայանը ֆեյսբուքյան իր էջում գրել է․ «Նախորդ բոլոր իշխանությունների կառավարման տարիներին արտագաղթած մեր հայրենակիցների մի ստվար հատված կա, որ կուրորեն պաշտպանում է այս իշխանություններին: Նրանցից մի քանիսին անձամբ եմ ճանաչում: Նրանք ինձ ազգի դավաճան են ասում, քանի որ քննադատում եմ կապիտուլյանտ իշխանությանը:
Այսօր, երբ ներկայիս իշխանությունը վերարտադրված է, հազարավոր մեր հայրենակիցներ մեծ թափով արտագաղթում են, քանի որ այս իշխանությունների ապագայից սարսափած են:
Հարց է առաջանում. ինչո՞ւ այս իշխանություններին կուրորեն պաշտպանողները, որ նախկին իշխանությունների ժամանակ արտագաղթել են, չեն վերադառնում հայրենիք, որպեսզի լրացնեն այս իշխանությունների օրոք արտագաղթողների տեղը:
Նախկիններից զզված ու դրա պատճառով արտագաղթած սիրելի հայրենակիցներ, վերադարձեք ձեր երազանքի իշխանության հայրենիք՝ ժամանակին թիկունք լինելու ձեր սիրելի իշխանությանը: Հիմա գնալու հերթը մերն է:
Հ.Գ. Մենք էլի չենք գնա, կմնանք, որ հեռվից սիրելու և կարոտելու համար ձեզ բան թողնենք»: