«Մեր սահմանապահ համայնքների բնակիչները մեն-մենակ են մնում ադրբեջանցիների դեմ». Սեյրան Օհանյան

«Մեր սահմանապահ համայնքների բնակիչները մեն-մենակ են մնում ադրբեջանցիների դեմ, և ՊՆ-ն ու ԱԱԾ-ն ոչ միայն նրանց միայնակ չպետք է թողնեն, հակառակը՝ այդ համայնքների բնակիչներին պետք է զինեն, զորակոչեն և ներգրավեն սահմանապահ աշխատանքներում»,- այսօր «Արմնյուզ»-ի եթերում ասել է ՀՀ պաշտպանության նախկին նախարար, «Հայաստան» դաշինքի անդամ Սեյրան Օհանյանը:

Ըստ Օհանյանի՝ բացի Իրանի և Թուրքիայի հետ սահմանների պահպանությունից՝ ռուսները երբեք չեն մասնակցել ՀՀ սահմանագծի պաշտպանությանը. «ԶՈՒ կառուցվածքը պետք է համապատասխանեցնել նոր խնդիրներին, այդ խնդիրներն ավելացել են, և ռազմաքաղաքական ղեկավարությունը պետք է համալրում իրականացնի, դրա համար կա զորահավաքային պատրաստականության պլան: Այդ համալրումն ուղարկվում է ոչ թե մարտադաշտ, այլ՝ մեր սահմանների պաշտպանությանը»,- ասել է նա:
Սեյրան Օհանյանի պնդմամբ՝ պետական կառավարման համակարգը պետք է նպատակաուղղվի անվտանգության, տնտեսության, բարոյահոգեբանական մթնոլորտի ամրապնդմանը. «Պատերազմի պատասխանատուներին վերհանելը ծավալուն աշխատանք է պահանջում: Դա պետք է քննարկվի գաղտնիության պայմաններում: Պետական և ռազմական կառավարման հարցերում եղել են լրջագույն թերություններ: Իրավապահ համակարգը պետք է գնահատականներ տա, հարուցված քրեական գործերում պետք է վեր հանվեն, օրինակ, դավաճանության դրվագները»,- ամփոփել է Սեյրան Օհանյանը:

Մանրամասները՝ տեսանյութում: