«Կանխատեսելով ձեր որոշումը՝ ունեմ ներքին անարդարության ու համընդհանուր պարտության զգացում»․ Դավիթ Հարությունյան

«Սահմանադրական դատարանն այս գործով պատմական հնարավորություն ունի ոչ միայն լուծելու ԱԺ արտահերթ ընտրությունների արդյունքում առաջացած իրավական վեճը, այլ իր որոշմամբ շատ ավելի հեռուն գնացող հայտ ներկայացնելու՝ դառնալու ՀՀ–ում Սահմանադրության և սահմանադրական կարգի իրական պաշտպան»,- այսօր՝ ՍԴ նիստի ժամանակ ելույթ ունենալիս դիմելով դատավորներին՝ հայտարարեց «Պատիվ ունեմ» դաշինքի ներկայացուցիչ Դավիթ Հարությունյանը։

«Սակայն առաջնորդությունն ունի իր գինը ու դուք պետք է պատրաստ լինեք այն վճարելու՝ ստանձնելով ձեր բաժին պատասխանատվությունը․ այդ գինը դժվարին և շարունակական աշխատանք է՝ որոշումներ կայացնելու համարձակությունը, ճնշմանը դիմակայելու ունակությունը և ինքներդ ձեզ երբեք չխաբելու բացառիկ ազնվությունը։ Ի վերջո, ոչ ոք չի կարող խուսափել վաղվա պատասխանատվությունից՝ խուսափելով դրանից այսօր»,- ասաց նա։

«Առաջին անգամ է, որ ես, կանխատեսելով ձեր որոշումը, ունեմ անհատապես ներքին անարդարության ու համընդհանուր պարտության զգացում։ Ձեր վճռից է կախված, թե ինչ ճանապարհով կընթանա պետությունը»,- նշեց Հարությունյանը։