«Երբ Փաշինյանի արձանն էին տեղադրել, գրեցի՝ ձեզ համար կուռքեր մի՛ սարքեք, արձանի ճակատագիրը վատ է լինելու»․ Ոսկան Սարգսյան

Լրագրող Ոսկան Սարգսյանի գրառումը. «2018թ․ ամռանը երբ ժողովուրդը ցնծում էր թավշա հեղափոխությամբ , ես ներկայացրի չինական առածն այն մասին, թե ինչպես հերոսը հաղթում է հրեշին, սպանում նրան, բազմում նրա պալատում, և․․․ինքը հրեշ դառնում։ Նաև մի պատմություն հրապարակեցի, երբ չար թագավորը մեռնում է, բոլորը ցնծում են, մի պառավ կին լացում է։ Նրա վրա զայրանում են, ասելով՝ ինչո՞ւ ես լացում, ջադու, չէ որ բոլորն ուրախ են։ Նա պատասխանում է, որ իր երկար կյանքում 4 թագավոր է տեսել, ամեն հաջորդը՝ նախորդից վատ, վախենում է, որ նոր թագավորն ավելի վատ էլինելու։
Երբ Իջևանի հարավային մուտքին Նիկոլ Փաշինյանի քայլող արձանն էին տեղադրել, գրեցի՝ երկրի վրա ձեզ համար կուռքեր մի՛ սարքեք, այդ արձանի ճակատագիրը վատ է լինելու, քանզի մինչ այդ տեսել, գրել էի, որ Տավուշի մարզպետարանի շենքի դիմաց տեղադրված Ջեմմա Անանյանի (ով նաև շատ կարևոր գործեր է արել) կենդանության օրոք, նրա սպիտակ արձանն էին կարմիր ներկով ներկել»։