«Աբսուրդ է չէ՞․ առաջարկում եմ ծանր չտանել»․ Վարդան Հարությունյան

Իրավապաշտպան Վարդան Հարությունյանի գրառումը․ «Խորհրդարանում որոշվել է, որ Մարդու իրավունքների պաշտպանության հանձնաժողովի նախագահ է լինելու «Պատիվ ունեմ» դաշինքի ներկայացուցիչը: Մարդիկ տարակուսում են։ Դե, պարզ է, այս դաշինքում հայտնված մարդիկ տարիներ շարունակ հայտնի են եղել որպես իրավունք խախտողներ։ Առաջարկում եմ ծանր չտանել։ Դեռ ավելի հետաքրքիր դեպքեր են լինելու։ Աբսուրդ է չէ՞ մեր կյանքը։ Արդեն մոտ մեկ տարի։ Դեռ շարունակվելու է այս աբսուրդը։
Այս կապակցությամբ մի բան պատմեմ․
1999-ի կամ 2000-2001-ի կողմերը, հիմա արդեն լավ չեմ հիշում, Ռուսաստանի նախագահին առընթեր մարդու իրավունքների պաշտպանության հանձնաժողովի նախագահի նախաձեռնությամբ Պետերբուրգում ԱՊՀ երկրների նմանատիպ կառույցների համաժողով էր կազմակերպվել։ Բոլոր հանրապետություններից էլ կային ներկայացուցիչներ։ Բելառուսից՝ նույնպես։ Բայց, ի տարբերություն մյուս հանրապետությունների, Բելառուսը ներկայացնում էր նրանց գլխավոր դատախազի տեղակալը։ Նիստը վարող Ռուսաստանի ներկայացուցիչը զարմացած հարցրեց․
— Չկա՞ր մեկը, որ ուղարկեիք ձեր փոխարեն։
— Իսկ ինչո՞ւ, մենք էլ մարդու իրավունքները վատ չենք պաշտպանում, — պատասխանեց դատախազը և միացավ դահլիճում պայթած ծիծաղին»։