«Որքան էլ տարօրինակ չհնչի, Ալիևը մեզ է ցույց տալիս, թե ինչ է պետք անել և ինչով է պետք զբաղվել». Ա. Բաբաջանյան

ԱԺ նախկին պատգամավոր Արման Բաբաջանյանի գրառումը. «Ալիևը մի կողմից պատրաստվում է «խաղաղ մրցակցության» ռեժիմի, մյուս կողմից նա պատրաստվում է ապագա պատերազմների:
Ադրբեջանի նախագահը երեկ այցելել է ադրբեջանական վերահսկողության տակ անցած Լաչին և Քելբաջար: Ալիևը հետևել է Լաչինի շրջանում կառուցվող միջազգային օդանավակայանի շինարարությանը, նաև մասնակցել Լաչինի շրջանից Քելբաջար թունելի շինարարության հիմնարկեքին: Ադրբեջանի ղեկավարը տնտեսական և ռազմաքաղաքական ենթակառուցվածքային տրամաբանությամբ փորձում է արագորեն յուրացնել ադրբեջանական վերահսկողության տակ անցած գոտիները, այդպիսով հետապնդելով, թերևս, մի քանի նպատակ:
Լաչինի շրջանից Քելբաջարի շրջան թունելը, անկասկած, ունի ռազմական ենթակառուցվածքային նշանակություն, ինչը հասկանալու համար՝ բավարար է նայել քարտեզին:
Որքան էլ չհնչի տարօրինակ, Ալիևը մեզ է ցույց տալիս, թե ինչ է պետք անել և ինչով է պետք զբաղվել, Ազգային ժողովում ներքաղաքական մանրախնդիր և դատարկ հայհոյախոսություններով ձևավորվող օրակարգի փոխարեն:
Հայաստանը և Արցախը պետք է ինտենսիվ պատրաստվեն թե՛ խաղաղության, թե՛ պատերազմի, պատրաստ լինեն ռեգիոնալ թե՛ մեկ, թե՛ մյուս ռեժիմին՝ իրականացնելով տնտեսական և ռազմաքաղաքական բնույթի խոշոր ենթակառուցվածքային ծրագրեր»: