Վանաձորում ավագանու ընտրությունները տեղի կունենան համայնքի խոշորացումից հետո

Վանաձորում հոկտեմբերի 17-ին ավագանու ընտրություններ տեղի չեն ունենա, քանի որ համայնքների, այդ թվում՝ Վանաձորի խոշորացման գործընթաց է տեղի ունենում և կառավարությունում շրջանառվող նախագծերով հարակից մի քանի փոքր գյուղեր կմիանան Վանաձորին։ Այս մասին «Ազատության»-ն ասաց Լոռու մարզպետ Արամ Խաչատրյանը։

2016-ին Վանաձորում և Գյումրիում նույն օրն էին տեղի ունեցել համայնքապետի համամասնական ընտրակարգով ընտրությունները։ Երեկ Շիրակի մարզպետը որոշում է կայացրել հոկտեմբերի 17-ին Գյումրիում ընտրություններ նշանակելու մասին։ Մինչդեռ Վանաձորում ընտրություններն ավելի ուշ տեղի կունենան՝ խոշորացումից հետո։

Ավելի վաղ հայտնի էր, որ հոկտեմբերի 17-ին Լոռու երեք համայնքներում՝ Թումանյանում, Մարգահովիտում և Ֆիոլետովոյում ընտրություններ կլինեն, սակայն նախօրենին Լոռու մարզպետը չեղարկել է իր՝ 10 օր առաջ կայացրած որոշումը Թումանյանի և Մարգահովիտի մասով․ երկու ամսից ընտրություններ տեղի կունենան միայն Ֆիոլետովո գյուղում, որը, փաստորեն, խոշորացման պլաններում ներառված չէ։