«Դուք Իշխան Սաղաթելյանին մեղադրում եք սպանություն հրահրելու մեջ»․ Ալեքսանյանը՝ Ղազինյանին

«Ասացիք՝ հոկտեմբերի 19-ի հրադադարի առաջարկը մերժելը փաստացի սպանություն էր: Այսինքն՝ Դուք ձեր գործընկեր Իշխան Սաղաթելյանին մեղադրում եք սպանություն հրահրելու մեջ»,- դիմելով «Հայաստան» խմբակցության պատգամավոր, պաշտպանության և անվտանգության հարցերի հանձնաժողովի նախագահի տեղակալի թեկնածու Արթուր Ղազինյանին՝ ասաց ՔՊ-ական Վահագն Ալեքսանյանը՝ պարզաբանելով. «Սաղաթելյանը հոկտեմբեի 19-ին տեղեկանալով, որ կա նման հնարավորություն, լայվով հայտարարում է, որ չի կարելի ոչ մի պարագայում համաձայնել հրադադարին»:

Ղազինյանն ասաց, որ Սաղաթելյանը, լինելով արտախորհրդարանական ընդդիմություն, օբյեկտիվորեն զրկված է եղել ճակատում տիրող իրավիճակի վերաբերյալ տեղեկատվությունից, որևէ պատասխանատվություն չի կրել երկրի ապագայի համար. «Հետևաբար նա իր դիրքորոշումն արտահայտել է այն տեղեկատվության վրա, որ տրամադրվել է անվտանգության խորհրդի նիստում ու առաջնորդվել արծրունհովհաննիսյանական թեզերով՝ միգուցե հավատալով, որ իրավիճակն այդքան էլ աղետալի չէ ու կարիք չկա գնալու համաձայնության»,- ասաց Ղազինյանը:

Հիշեցնենք՝ քննարկման ժամանակ Արթուր Ղազինյանը հայտարարել էր՝ այն անձը, ով մերժեց պատերազմը կանգնեցնելու առաջարկությունը՝ ասելով, որ կասեն դավաճան, որի հետևանքով ունեցանք հազարավոր զոհեր, հայրենիքի կորուստ, մեղավոր ու պատասխանատու է և պետք է կրի քրեական պատասխատվություն: