«Ինքն էլ մեզ համար է անընդունելի». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է․ «Երկու օր առաջ Սերժ Սարգսյանը նույնպես, Քոչարյանի ասածին համահունչ, հայտարարեց, որ նիկոլին հեռացնելու գործում պատրաստ է համագործակցել ում հետ ասես, բացի մեկ ուժից։
Սարգսյանինը՝ Քոչարյանի պես նույնքան թափանցիկ ակնարկ էր՝ ուղղված Բևեռին։ Սարգսյանը, որի ռեժիմը տարիներ շարունակ նիկոլի ռեժիմի հետ համահունչ տարածել է այն թեզը թե իբրև թե «Սասնա Ծռերը Սերժի պրոյեկտն» էին՝ հիմա հստակ ասում է, որ իր համար ամենաանընդունելի քաղաքական ուժը նիկոլից հետո Բևեռն է։
Եվ լավ է անում։ Ինքն էլ մեզ համար է անընդունելի։ Եվ մենք ինչպես Քոչարյանի պարագայում, այնպես էլ՝ իր, որևէ դեպքում չենք համագործակցելու իր կամ իր հետևորդների հին կամ նոր սերնդի հետ։
Բայց հետաքրքիր է մի հանգամանք։ Մինչ Քոչարյանին Մոսկվան է սնում և հովանավորում, Սարգսյանին այն պահում է ջրի երես՝ միայն սեփական օրակարգը բոլոր կողմերից սպասարկելու համար։ Ակնհայտ է, որ Սարգսյանին երբեք այլևս Կրեմլը Հայաստանում իշխանություն չի վստահելու։ Անհերքելի է նաև, որ տասնութ թվականի չհեղափոխությունը Կրեմլը կազմակերպեց հենց Սերժ Սարգսյանին հեռացնելու համար։ Եվ այդ մասին անգամ ինքը՝ Սարգսյանն է ակնարկել իր հայտնի ասուլիսում։
Ու հիմա, փոխանակ մեկ գրամ իմաստնություն դրսևորելու՝ շախմատիստի կեղծ համբավ կերտած խաղացողը, փոխանակ ինքը դառնալու «Սասնա Ծռերի պրոյեկտ»՝ այսինքն կտրուկ անցում կատարելու իրական ազգային դաշտ՝ շարունակում է սպասարկել իրեն տապալած, երկիրը ոչնչացրած միևնույն արտաքին ուժին։
Այսպիսի քաղաքական ստրկամտությամբ, տգետ տկարամտությամբ էլ երկիրը կառավարվել է երեսուն տարի։ Եվ դասեր չեն քաղել։ Ո՛չ նախկինները և հատկապես ո՛չ էլ ներկաները։
Մենք ձեր համագործակցությունը երբևէ չենք էլ փնտրել։ Նիկոլին հեռացնելուց հետո ձեզ ենք հեռացնելու հեռավոր վայրեր։ Այդ օրն անպայման գալու է։
Իսկ մինչ այդ դուք շարունակեք Հայաստանը թշնամուն հանձնած ու ձեզ ընդամենն օգտագործող թշնամու դաշնակցին ծառայել։
Շարունակեք կեղծ հայրենասիրություն խաղալով՝ դրանով Մոսկվայի միջոցով Անկարային ու Բաքվին ծառայել։
Ձեզ արդարադատության առջև կանգնեցնելու օրն էլ կգա։ Անպայման կգա»։