«Պետք չէ ներդրումները կիրառել որպես ՀՀ-ի հանդեպ քաղաքական պարտադրանքի գործիք». Արման Բաբաջանյան

Նախկին պատգամավոր Արման Բաբաջանյանը ֆեյսբուքյան իր էջում գրում է. «Եթե ռուսահայ օլիգարխիան աղետալի պատերազմից հետո հայրենիքում ներդրումներն անում է Հայաստանին քաղաքական պայմաններ թելադրելու դիմաց, ինչն արվում է Ռուսաստանի քաղաքական իշխանության մակարդակով, պարզապես օգտագործելով ռուսահայ կապիտալը, ապա այստեղ կա առնվազն մտորելու լրջագույն առիթ, եթե չասենք՝ այդպիսի ներդրումներին ընդդիմանալու:
Պետք չէ ներդրումները կիրառել որպես Հայաստանի հանդեպ քաղաքական պարտադրանքի գործիք: Հասկանալի է, որ կան իսկապես բավականին նուրբ հանգամանքներ, կապված Ռուսաստանի բնույթի, հետևաբար նաև այդ երկրում գործող հայկական խոշոր կապիտալի գործունեության շերտերի հետ: Բայց, հայկական խոշոր կապիտալը պետք է ունենա առաջինն ինքն այդ նուրբ շերտերը քաղաքական ինտելեկտով և ազգային արժանապատվությամբ հավասարակշռելու կարողություն»: