«Սա մտապահեք. հետո պետք կգա իշխանություններին գնահատական տալու համար». Արա Պապյան

ԱԺԲ անդամ, դիվանագետ Արա Պապյանը ֆեյսբուքյան իր էջում գրում է. «Ճանապա՞րհ, թե՞ միջանցք. ոմանք ասում են, որ Ադրբեջանը Սյունիքի վրայով ճանապարհ/ներ է ստանալու, ոմանք՝ միջանցք/ներ: Այս հարցին հնարավոր է պատասախանել, եթե հստակ պատկերացնենք, թե ո՞րն է միջազգային իրավունքում ճանապարհի և միջանցքի տարբերությունը:

Ֆիզիկական առումով դրանք կարող են տարբերություն չունենալ, կամ գրեթե չունենալ: Տարբերությունը նրանց կարգավիճակի մեջ է՝ այն կարգի, որը գործելու է այդտեղ: Ճանապարհի դեպքում ավտոմեքենայի վարորդը, գնացքի մեքենավարը, ուղևորները և այլն, Սյունիքի, այն է Հայաստանի սուվերեն տարածք մուտք գործելիս առնվազն պիտի անձնագրի մեջ մուտքի կնիք ստանա և դուրս գալիս էլ ելքի կնիք: Առնվազնը կգործի այն դեպքում, եթե երկրների միջև գործում է առանց վիզայի ելումուտի կարգ կամ արդեն անձնագր/եր/ի մեջ առկա է մուտքի վիզա: Բեռնատարները կամ գնացքի վագոնները պիտի կապարակնքվեն, ձևակերպվեն տարանցիկ փոխադրման փաստաթղթերը, և դրանց առկայությունը պիտի ստուգվի Հայաստանից ելքի վրա: Տարանցիկ փոխադրման վճարի հարցը կարգավիճակի առումով էական չէ և զուտ փոխադարձ պայմանավորվածության հարց է՝ այն կարող է լինել, կարող է չլինել:

Եթե միջանցք է, ապա ո՛չ անձինք և ո՛չ էլ ավտոմեքենաները, գնացքները և այլն, Ադրբեջանից Սյունիք, այն է Հայաստանի Հանրապետություն, մտնելիս ենթակա չեն վերոնշյալ գործողություններին: Նրանք պարզապես գալիս ու անցնում են ՀՀ տարածքով:

Ո՞րն է լինելու՝ միջանցք, թե՞ ճանապարհ, ես չգիտեմ: Գուցե ոչ մեկը: Տա աստված, ԱՄՆ-ը և Իրանը՝ ոչ մեկը: Բայց սա մտապահեք. հետո պետք կգա իշխանություներին գնահատական տալու համար»: