«Սարգսյանը չէր ուզում լինել վարչապետ». Հակոբ Բադալյան

Քաղաքական մեկնաբան Հակոբ Բադալյանը գրում է. «Ես շատ քչերից էի, կամ նույնիսկ չգիտեմ էլ, թե հանրայնորեն էլ ովքեր էին արտահայտում այդպիսի կարծիք (թող ներող լինեն, եթե չեմ հիշում), որ կասկած էի հայտնում, թե Սերժ Սարգսյանն աներկբա գնալու է վարչապետության, այսինքն՝ դե ֆակտո երրորդ ժամկետի:

Ավելին, ամիսը, ցավոք, չեմ հիշում, բայց 2018-ին Կենտրոնի եթերում քննարկման ժամանակ հարցին՝ կգնա վարչապետ, թե ոչ, պատասխանել եմ, որ չեմ կարող ասել, կգնա, թե ոչ, բայց կարող եմ թվել մի շարք ներքին ու արտաքին ռիսկեր, որ կառաջանան վարչապետ գնալիս և Սերժ Սարգսյանի պաշտոնավարումը կարող է լինել ոչ երկար: Մտքովս էլ չէր անցնի, իհարկե, մեկ շաբաթը կամ հեղափոխական զարգացումը, մարգարե չեմ:

Պարզապես համոզված էի և այսօր էլ մնում եմ այդ կարծիքին, որ Սարգսյանը չէր ուզում լինել վարչապետ՝ շատ լավ պատկերացնելով, որ պատերազմ զսպելու հարցում գրեթե զրոյանում է Հայաստանի մանևրի հնարավորությունը: Բայց, Ռուսաստանն էլ մտածում էր իր մանևրի մասին»: