«Դատավորն այնքան հարգանք չունենա դատարանի նկատմամբ, որ ասի՝ գիտե՞ք՝ ես ընդմիջում չեմ արել»․ Արամ Վարդևանյան

«Տեսանք ամեն ինչ, բացի դատական պրոցեսից»,- այսօր լրագրողների հետ զրույցում՝ անդրադառնալով Գորիսի քաղաքապետ Առուշ Առուշանյանի գործով դատական նիստին՝ ասաց «Հայաստան» խմբակցության պատգամավոր Արամ Վարդևանյանը:
«Տեխնիկական հարցով դատարանը 3-4 ժամ հեռանում է խորհրդակցական սենյակ, հետո մեկ այլ ավելի տեխնիկանան հարցով՝ ևս 3-4 ժամ: Դատավորը դատարանի նկատմամբ անհարգալից վերաբերմունք դրսևորեց․․․ սա ի՞նչ վարքագիծ էր: Սահմանադրությունն ասում է՝ մարդու անձնական ազատությունն ամենագերակայող իրավունքներից է, բայց դուք տեսաք, որ դատավորը արհեստական մի քանի ժամ գոնե ձգձգտում է նիստը, հետո դատախազությունից միջնորդություն է ներկայացվում, որ այդտեղ էլ գնա, մի քանի ժամ ձգձգի․․․դատավորն այնքան հարգանք չունենա դատարանի նկատմամբ, որ ասի՝ գիտե՞ք՝ ես ընդմիջում չեմ արել․․․»,- նշեց Վարդևանյանը։
«Իշխանությունները չեն կարողանում հանդուրժել, որ Առուշ Առուշանյանը, լինելով կալանավորված, կարողացավ Գորիսի ընտրություններում նման արդյունք գրանցել, երբ իրենք, ամբողջ ռեսուրսը օգտագործելով, ինչքան պատգամավոր ու պաշտոնյա ունեին, մասնակցում էին քարոզարշավին»,- հավելեց նա։