«30-ամյա անկախ պետության կրտսեր դպրոցի ամեն 100 աշակերտից 35-ը կարդալ չգիտի, էս ա Սյունիքի հանձնելը»․ Փաշինյան

«Էսօր մեզ ասում են՝ Սյունիքը մաս-մաս հանձնում են։ Եկեք նայենք, թե որն է Սյունիքի հանձնման բանաձևը։ 2018 թվականի դրությամբ, Սյունիքի մարզի նախադպրոցական տարիքի երեխաների 4 տոկոսն է ունեցել հասանելիություն մանկապարտեզներին և նախադպրոցական հիմնարկներին, 100 երեխայից 4-ն է կարողացել գնալ մանկապարտեզ։ Էս ա Սյունիքի մարզի հանձնելը»,- ՏԻՄ ընտրությունների քարոզարշավի կապակցությամբ կազմակերպված «Քաղաքացիական պայմանագիր» կուսակցության դրամահավաք երեկոյին ասաց ՀՀ վարչապետ Նիկոլ Փաշինյանը։

«Մենք այսօր կառավարությունում խոսում էինք այն մասին, որ միայն Սյունիքի մի համայնքում բոլոր երեխաներին կրթական պրոցեսի մեջ ներգրավելու համար 9 մլրդ դրամի հատկացում է արվում։ Հայաստանի պատմության մեջ չի եղել մի դեպք, երբ կառավարությունը մի համայնքում 9 մլրդ դրամի կրթական ծրագիր իրականացնի»,- ասաց Փաշինյանը։ «Անվտանգությունը թեև մեր ամենախոցելի տեղն է, բայց անվտանգության մարտահրավերը ծագում է այն ժամանակ, երբ որ երկրի կրտսեր դպրոցի ավարտած աշակերտների 35 տոկոսը կարդալ չգիտի, 2019 թվ-ի դրությամբ։ 30-ամյա անկախ պետության կրտսեր դպրոցի ամեն 100 աշակերտից 35-ը կարդալ չգիտի։ Էդ ա անվտանգության մարտահրավերը, կամ էդտեղից սերմանված մարտահրավերն ա, որ ջարդվելա մեր գլխին»,- ասաց Փաշինյանը։