«ԲԴԽ-ի աչքերը փակ են այդ ապօրինի գործընթացների վրա». Վահե Հակոբյան

«Այսօր մեզ մոտ տոտալ տիրում է իրավական ամենաթողություն. Դա մեկ նպատակ է հետապնդում՝ կոտրել մեր ողջ ազգի ողնաշարը, չկարողանանք դիմադրել այն մարտահրավերներին, որոնք գրեթե բոլոր գերտերությունների կողմից այսօր նետված են դեպի Հայաստան»,- այսօր ԲԴԽ-ի մոտ ընթացող բողոքի ակցիայի ժամանակ ասաց «Հայաստան» խմբակցության պատգամավոր Վահե Հակոբյանը:

«Քաջարանի գործող քաղաքապետը, Գորիսի, Վանաձորի ընտրված համայնքապետերն ապօրինի կալանավորված են, վառ ապացույցն ընթացող դատական գործընթացներն են, իսկ ԲԴԽ-ի աչքերը փակ են այդ գործընթացների վրա, որոնք կատարվում են: Մարդիկ հրաժարվում են ցուցմունքներից, որոնք իրենք տվել են ճնշման տակ, որի մասին իրենք բարձրաձայնում են»,- ասաց պատգամավորը:

Այս պահին ընդդիմադիր քաղաքական գործիչները՝ քաղաքացիների հետ միասին երթով գնում են դեպի Գլխավոր դատախազություն: