«Մնում է՝ ավտոմեքենաները մարդկանց գլխին կայանեն»․ Արշալույս Մղդեսյան

«Մեդիա կենտրոն» ծրագրի խմբագիր-համակարգող Արշալույս Մղդեսյանը ֆեյսբուքյան իր էջում գրել է. «Երևանը կյանքի համար շատ հարմար քաղաքից վերածվել է մարդկանց համար գերանհարմար հախուռն քաղաքի։ Քաղաքն արդեն վաղուց մարդկանց համար չէ, ավտոմեքենաները մնում է մարդկանց գլխին կայանեն։ Անգամ Կասկադի ամենաներսի հատվածն են բացել ավտոմեքենաների համար, ինչն աբսուրդ է։
Սա տարիների ընթացքում մայրաքաղաքի ենթակառուցվածքների հետևողական քայքայման հետևանք է։ Քաղաքում մետրոն մեղմ ասած թերզարգացած է, վերգետնյա հանրային տրանսպորտը նոր-նոր սկսել է կենդանության նշաններ ցույց տալ, քաղաքը չունի տրամվայ, որը կանաչ և հարմար տրանսպորտի կարևորագույն տարբերակներից է։ Քաղաքը ծանրաբեռնված հախուռն ու ամեն տեղ կառուցվող բազմահարկ բնակելի շենքերով, մեծ սուպերմարկետներով, որոնք պետք է ծայրամասերում լինեին։
Շատ քիչ են վերգետնյա ու ստորգետնյա մեծ տարողունակության ավտոկայանատեղերը, շատ էժան է փարքինգը, հատկապես կենտրոնում, չկան ավտոբուսների համար առանձնացված ուղիներ։
Սրանք խնդիրների էն քիչ մասն է, որ մարդկանց կյանքը մայրաքաղաքում դարձնում է սթրեսային, անհարմար, իսկ երբեմն՝ անտանելի։ Հայաստանում, եթե որևէ քաղաքում, լինի դա Գյումրին կամ Վանաձորը, սկսեն էս բոլոր խնդիրները հետևողական լուծել, կանխատեսում եմ Երևանից ահագին ներհոսք էդ քաղաքներ։ Եթե իհարկե նման բան արվի ու դրա կարևորությունը հասկանան»: