«Ադրբեջանը կստանա իր ուզածից պակաս, ՀՀ իշխանություններն էլ կզիջեն ավելի շատ, քան պատրաստ են». Արման Մելիքյան

Արցախի նախկին արտգործնախարար Արման Մելիքյանը ֆեյսբուքյան էջում գրել է. «Ադրբեջանական կողմի պնդումներն էլ, պաշտոնական Երևանի արձագանքն էլ դժվար թե կարող են իրականության օբյեկտիվ արտացոլում համարվել: Կարծում եմ, որ Ադրբեջանը կստանա իր ուզածից պակաս, իսկ Հայաստանի իշխանություններն էլ կզիջեն ավելի շատ, քան այսօր առերևույթ պատրաստ են, եթե հիմնվենք իրենց ընթացիկ հայտարարությունների վրա: Ուստի հայ-ադրբեջանական դիվանագիտական «լեզվակռիվը» ես դիտարկում եմ հենց այս համատեքստում: Պետք է հաշվի առնենք, որ պաշտոնական Երևանը հանդես է գալիս պատերազմում պարտված և արտաքին աջակցություն հայցող կողմի դիրքերից, մինչդեռ նախագահ Ալիևը ներկայանում է որպես սեփական ուժերին ապավինող հաղթանակած հզոր առաջնորդ, որն ի զորու է ինքնուրույն լուծել իր երկրի առջև ծառացած խնդիրները՝ լինի դա քաղաքական, թե ռազմական միջոցներով: Իրականում երկու կողմերն էլ իրենց պարտության կամ հաղթանակի համար պարտական են արտաքին ուժերին և լուծումերի փուլում հենց վերջիներս էլ կունենան որոշիչ խոսք ասելու իրավունքը»: