«Ի՞նչ է իրականում տեղի ունեցել». Սուրեն Սարգսյան

Միջազգայանգետ Սուրեն Սարգսյանը ֆեյսբուքյան իր էջում գրել է. «Երեկ մի ամբողջ օր շրջանառվեց թեզ, համաձայն որի՝ Բայդենն օրենք է ստորագրել Թուրքիային և Ադրբեջանին պատասխանատվության ենթարկելու վերաբերյալ: Ի՞նչ է իրականում տեղի ունեցել: Իրականում Բայդենն ստորագրել է Ազգային պաշտպանությանը վերաբերող օրենքը, որի 1302-րդ հոդվածով նախատեսված է, որ գործադիրը պարտավոր է 180 օրվա ընթացքում Կոնգրեսին զեկույց ներկայացնել հայ-ադրբեջանական պատերազմի մասին:

Միաժամանակ այս օրենքով ամրագրված է 2020թ. նոյեմբերի 9-ի համաձայնագրերի կատարման անհրաժեշտությունը և կա «ռազմագերիների վերադարձ» ձևակերպումը: Կոնգրեսին պետք է նաև ներկայացվեն տեղեկություններ, արտաքին ուժերի ներգրավվածության մասին:

Այսքան բան: Այս օրենքով որևէ պատժամիջոց կամ պատժիչ գործողություն նախատեսված չէ:

Ցավոք 907-րդ բանաձևին վերաբերող դրույթն այդպես էլ մեր լոբբիստները չկարողացան անցկացնել այս օրենքում, քանի որ միայնակ էին թուրք-ադրբեջանական տանդեմի դեմ պայքարում:

Հ. Գ. Մենք այս օրենքը կարող ենք կիրառել քարոզչական տեսանկյունից, եթե, իհարկե, ունենք թուրքական և ադրբեջանական քարոզչությանը հակակշռելու ցանկություն»: