Ուրբաթ, 22 սեպտեմբերի, 2023 թ.
|
Ստեփանակերտում`   +15 °C

«Ղազախստանը կրելու է շոշափելի կորուստներ»․ Խոսրով Հարությունյան

«Ղազախստանը կրելու է շոշափելի կորուստներ»․ Խոսրով Հարությունյան
280
Հինգշաբթի, 06 հունվարի, 2022 թ., 14:24

ՀՀ նախկին վարչապետ Խոսրով Հարությունյանի գրառումը. «Գունավոր հեղաշրջման ալիքը հասավ նաև Ղազախստան: Իհարկե այդ երկրում առաջիկա զարգացումները ցույց կտան՝ արդյո՞ք այդ իրադարձությունները արձանագրում են Ռուսաստանի ողջ սահմանի երկայնքով այսպես կոչված «անակոնդայի օղակ» ծրագրի իրականացման հերթական փուլի մեկնարկը, թե՞ այդ ամենը թուրքալեզու պետությունների աշխարհաքաղաքական վերջին ամբիցիաներին Արևմուտքի արձագանքի դրսևորումն է, թե՞ դրանք ինչ-որ կապ ունեն Ռուսաստանի կողմից ԱՄՆ-ին և ՆԱՏՕ-ին ուղղված ուլտիմատումին հավաքական Արևմուտքի հնարավոր մկանախաղի հետ, թե՞ այս բոլորը միասին: Իրոք, առաջիկա զարգացումները հնարավորություն կտան ստանալ մի շարք հարցերի պատասխաններ:
Բոլոր դեպքերում, անկախ զարգացումների սցենարներից ու արդյունքներից, հաշվի առնելով գունավոր հեղաշրջումների վերջին տարիների պատմությունը (Վրաստան, Ուկրաինա, Հայաստան), առանց սխալվելու հավանականոության կարելի է պնդել՝
1. Ղազախստանը կրելու է շոշափելի կորուստներ (նույնիսկ տարածքային կամ ինքնիշխանության)
2. ղազախական զարգացումները հանգեցնելու են Կենտրոնական Ասիայում աշխարհաքաղաքական ազդեցությունների որակապես նոր կոնֆիգուրացիայի, որում Ղազախստանի սուվերեն իրավունքները ստորադասվելու են արտաքին խաղացողների հետաքրքրություններին
3. որպես հետևանք նախորդ ենթադրությունների՝ էապես նվազելու է Ղազախստանի դերակատարումը թե՛ տարածաշրջանում և թե՛ եվարասիայում:
Ոչ պակաս կարևոր է թե այդ հեղաշրջումների հետագա վեկտորը ո՞ր ուղղությամբ կզարգանա՝ դեպի կասպյան ավազանի արևմտյան ա՞փ, թե՞ դեպի Կենտրանական Ասիայի մնացած հատվածներ, և արտաքին խաղացողներն ինչպես կծառայեցնեն այդ զարգացումներն իրենց ռազմավարական նպատակներին:
Կարծես թե 2022 թվականը խոստանում է լուրջ փորձություններ, այդ թվում և հատկապես հետխորհրդային տարածքի երկրների համար: Մեր խնդիրն է խուսափել նոր կորուստներից:
Բայց արդյո՞ք մենք դա գիտակցում ենք: Սա է հարցը»: