«Հայաստանին ևս ձեռնտու չէ Ռուսաստան-Ուկրաինա պատերազմը». Նաիրի Հոխիկյան

Լրագրող Նաիրի Հոխիկյանը գրում է. «Մեծ Բրիտանիայի ռազմական ինժեներներն օգնում են Լեհաստանի բանակին, որ Բելառուսի սահմանի հսկողությունն ավելի ուժեղացվի՝ իրենց խոսքով՝ ռուսական ագրեսիայից պաշտպանվելու համար։

Այս համատեքստում շարունակվում են Մեծ Բրիտանիայի և ԱՄՆ-ի կողմից մեծ քանակի զինտեխնիկայի մատակարարումներ Ռումինիա, Լեհաստան և հատկապես Ուկրաինա։ Լոնդոնն ամեն կերպ ձգտում է հասնել Ռուսաստան-Ուկրաինա ռազմական բախման, ինչի համար կրակի վրա յուղ է լցնում նաև Թուրքիան՝ կրկին մեծաքանակ «Բայրաքթար» ԱԹՍ-ներ ուղարկելով Ուկրաինա։

Հույս ունեմ, որ ամեն դեպքում ռուսական և ուկրաինական իշխանությունները խելամիտ կլինեն և պատերազմ չեն սկսի։ Նախ 7-10 օրում ռուսները կմտնեն Կիև և կապիտուլյացիայի կենթարկեն այդ երկիրը, և ոչ մի ՆԱՏՕ չի օգնի ուկրաինացիներին։ Բացի այդ, դա կլինի եղբայրասպան պատերազմ, որից կշահեն այլ պետություններ, բայց ոչ երբեք Ուկրաինան։

Հայաստանին ևս ձեռնտու չէ Ռուսաստան-Ուկրաինա հնարավոր պատերազմը, քանի որ Թուրքիան շատ արագ կօգտվի առիթից ու նոր ագրեսիա կսկսի մեր դեմ՝ Ադրբեջանի ու ահաբեկիչների միջոցով։ Հակամարտության շարունակական սրման պարագայում կրկին առևտրի մեջ կմտնի ռուսների հետ՝ խոստանալով չօգնել Ուկրաինային և փոխարենը պահանջելով զիջում՝ հայկական կողմի հաշվին»։