Ուրբաթ, 22 սեպտեմբերի, 2023 թ.
|
Ստեփանակերտում`   +15 °C

Ընտրությունների արդյունքներն ուժի մեջ մտնելուց հետո գովազդային պաստառները պետք է հանվեն. նոր նախագիծ. «Ժողովուրդ»

Ընտրությունների արդյունքներն ուժի մեջ մտնելուց հետո գովազդային պաստառները պետք է հանվեն. նոր նախագիծ. «Ժողովուրդ»
180
Հինգշաբթի, 24 փետրվարի, 2022 թ., 09:48

«Ժողովուրդ» օրաթերթը գրում է. «Ազգային ժողովի մարդու իրավունքների և հանրային հարցերով մշտական հանձնաժողովի նախագահ Թագուհի Թովմասյանը հանդես է եկել օրենսդրական նախաձեռնությամբ, որով կկանոնակարգվի քարոզչական պաստառներ փակցնելու կարգը:

Բանն այն է, որ «Հայաստանի Հանրապետության ընտրական օրենսգիրք»-ը սահմանում է քարոզչական պաստառներ և այլ նյութեր տեղադրելու, փակցնելու կարգը, սակայն հանման կարգ գոյություն չունի: Օրենքում որևէ կերպ կարգավորված չէ ընտրությունների արդյունքների վերաբերյալ ընտրական հանձնաժողովի որոշումն ուժի մեջ մտնելուց հետո քարոզչական պաստառ, քարոզչական տպագիր և այլ փակցված նյութերի հանման կարգը: Եվ, պատգամավորի փոխանցմամբ, ստեղծվում է այնպիսի իրավիճակ, երբ ընտրությունների արդյունքների վերաբերյալ վերջնական որոշումն ուժի մեջ մտնելուց հետո ամիսներ շարունակ քարոզչական պաստառ, քարոզչական տպագիր և այլ նյութեր ՀՀ մի շարք համայնքներում շարունակում են փակցված մնալ: Օրինակ՝ 2021 թվականի հունիսի 20-ին տեղի ունեցած ԱԺ արտահերթ ընտրություններից անցել է մոտ ութ ամիս, սակայն քարոզչական պաստառ, քարոզչական տպագիր և այլ նյութեր դեռևս փակցված են մի շարք համայնքներում: Այս պայմաններում հասարակությունը շարունակաբար գտնվում է նախընտրական մթնոլորտում, որը բացասաբար է անդրադառնում մարդկանց առօրյա կենսագործունեության վրա: Այսպիսով, պատգամավորն առաջարկում է ամրագրել, որ ընտրությունների վերջնական արդյունքներն ուժի մեջ մտնելուց հետո այդ պաստառները պետք է հանվեն. եթե դա չեն անում կուսակցությունները, գովազդային կազմակերպությունները, պետք է անի համայնքի ղեկավարը և փոխհատուցում պահանջի իր ծախսերի համար այն տեղադրողներից»:

Ամբողջական հոդվածը՝ թերթի համարում: