«Սա այսօր Եվրոպային սպառնացող ամենալուրջ սպառնալիքներից մեկն է». ռուսական զորքերը գրավել են Չեռնոբիլի ատոմակայանը

Ռուս զինվորականները վերահսկողության տակ են վերցրել Չեռնոբիլի ատոմակայանի տարածքը։ Այս տեղեկությունը UNIAN-ին տված հարցազրույցում հաստատել է նախագահի աշխատակազմի ղեկավարի խորհրդական Միխայիլ Պոդոլյակը։

Նրա խոսքով՝ ատոմակայանը ներկայումս վտանգված է, կա սադրանքների սպառնալիք։

«Դաժան մարտից հետո Չեռնոբիլի տեղամասի նկատմամբ մեր վերահսկողությունը կորցրեցինք: Նախկին Չեռնոբիլի ատոմակայանի օբյեկտների վիճակը, միջուկային թափոնների ճակատագիրն անհայտ է: Այս ուղղությամբ ռուսների բացարձակ անիմաստ հարձակումից հետո անհնար է ասել, որ Չեռնոբիլի ատոմակայանը անվտանգ է, սա այսօր Եվրոպային սպառնացող ամենալուրջ սպառնալիքներից մեկն է։ Իմանալով ռուսների սովորությունները՝ նրանք հավանաբար արդեն սադրիչ գործողություններ են պատրաստում Չեռնոբիլի ատոմակայանում: Կամ էլ հարձակման ժամանակ ստացված վնասվածքները կօգտագործեն՝ մեղադրելու համար Ուկրաինային, կամ նրանք իրենք կվնասեն այս անկասկած ամենավտանգավոր օբյեկտները»,- ասել է նա։