«Ռուսաստանն ունի հիբրիդային պատերազմի ահռելի ուժ». Հակոբ Բադալյան

Քաղաքական մեկնաբան Հակոբ Բադալյանի գրառումը․ «44-օրյա պատերազմում մեր տղերքի հերոսական կռիվը կասկածի տակ չէ, ինչպես և կասկածի տակ չէ այն, որ այո՛, եղել է խուճապ էլ, փախուստ էլ, չկա առանց դրա պատերազմ:

Այո՛, մեր զինուժը և կամավորականները հերոսաբար դիմադրել են մեր ուժը գերազանցող ահռելի ուժի, այն էլ ռազմա-քաղաքական տոտալ սեղմող օղակի պարագայում: Բայց, ուկրաինական պատերազմի ֆոնին, թերևս արժե հարգել նաև իրենց երկրի համար կռվող ուկրաինացի զինվորներին և չանել զուտ պատկերային համեմատություններ, արմատապես տարբեր բովանդակությունների պայմաններում:

Հավատացեք, նրանք պակաս հերոսական և անձնուրաց չեն: Պարզապես հաշվի առեք, որ անհամեմատելի են Ադրբեջանի ու Ռուսաստանի ուժերը: Անհամեմատելի են, անգամ Ադրբեջանի՝ թուրքական հրամանատարական և այլ աջակցությամբ, ու անգամ Ռուսաստանի բանակի «ավանդական» թերություններով հանդերձ:

Ու խնդիրը միայն սպառազինությունը չէ: Այդօրինակ պատերազմներում ահռելի դեր ունի հիբրիդային պատերազմ վարելու ուժը: Ուկրաինայի բուն խնդիրներն այսօր թերևս հենց այդտեղից են, Ռուսաստանն ունի հիբրիդային պատերազմի ահռելի ուժ (սա ճաշակի հարց չէ): Սպառազինական կարողությունից զատ դա ենթադրում է հետախուզա-դիվերսիոն տեխնոլոգիաների բազմազանություն, կիբերգործիքների բազմազանություն, քարոզչական գործիքակազմ: Ընդ որում՝ այդ ամենի կիրառումն սկսել է թերևս ռազմական գործողություններից դեռ շատ-շատ առաջ»: