«Պայքարը նրա համար չէ, որ մարդիկ կորցնեն զգոնությունը». Տարոն Սիմոնյան

Իրավաբան, ԱԺ նախկին պատգամավոր Տարոն Սիմոնյանի գրառումը․ «Միջազգային խաղաղության և արդարության համար պայքարը նրա համար չէ, որ մարդիկ կորցնեն զգոնությունն ու ձևավորեն չհիմնավորված հավատք անվտանգության համակարգերի, բարեկամ պետությունների, միջազգային կառույցների ու իրավունքի նկատմամբ, այլ որ սովորեն աշխատացնել այդ նույն անվտանգության համակարգերը, բարեկամ պետություններին, միջազգային կառույցներն ու իրավունքը, ինչքան էլ որ դժվարությամբ դրանք գործեն...

Դրանք ինքնաշխատ երևույթներ չեն, դրանց աշխատացնելու համար կամք ու աշխատասիրություն է պետք, ոչ թե խոսք ու նեղացկոտություն...

Այլապես կրկին զոհ ենք ունենալու սահմանին (ինչպես այսօր), մեր հայրենիքը մեր քթի տակից տանելու են, իսկ մենք մեղավորներ ու արդարացումներ ենք փնտրելու, միջազգային իրադարձություններ ու «չար» մարդկանց, որ դասագրքերում գրելու բան ունենանք, եթե, իհարկե, դրանք կարդացող լինեն...

Մի օր մենք կհասկանանք, որ վաղը խնդիր լուծելու համար, այսօր պետք է աշխատենք, իսկ այսօրվա չաշխատած ամեն օրվա վաղը պետք է տարով վճարենք։ Մի օր մենք կհասկանանք...»: