«Պուտինի համար բացարձակ նշանակություն չունի մարդկային կյանքը». Արթուր Սաքունց

Իրավապաշտպան Արթուր Սաքունցի գրառումը. «Պուտինն այնքան է խեղված սովետական պրոպագանդայով, որ համոզված է, թե Երկրորդ համաշխարհային պատերազմում Ստալինը հաղթել է, առանց Արևմտյան պետությունների աջակցության։ Առանց ԱՄՆ-ի, Մեծ Բրիտանիայի աջակցության միանշանակ չէր հաղթի Ստալինը։

Ինչու եմ այս հանգամանքի վրա ուշադրություն հրավիրում։
Ուրեմն՝ 141 պետություն դուրս են եկել Պուտինի սանձազերծած պատերազմի դեմ, իր քաղաքականության դեմ, դատապարտում են իրեն, ունի ընդամենը 5, այն էլ որևէ էական դեր չունեցող պետության աջակցություն։

Ուկրիանան ունի անթաքույց ամենատարբեր բնույթի աջակցությունն աշխարհի ու հատկապես զարգացած, հզոր Արևմտյան պետությունների կողմից։

Ու ինքը՝ Պուտինը, եթե գոնե մեկ ակնթարթ, գոնե մտքի մեջ փոքր-ինչ ունենար համոզմունք, որ Ստալինը չէր հաղթի առանց Արևմուտքի աջակցության, ապա տեսնելով նույնաբովանդակ և ավելի մեծ աջակցությունն Ուկրաինային, պետք է օր առաջ սուս ու փուս հետ քաշեր զորքերն ու դադարեցներ արկածախնդրությունը, պատերազմը։

Ու ցավոք, մոտ քսան տարի մնալով անպատիժ՝ ենթադրում է, թե հիմա էլ կարող է մնալ անպատիժ՝ անցնելով բոլոր հնարավոր սահմանները։

Ինչպես ցանկացած բռնապետի, այնպես էլ Պուտինի համար բացարձակ նշանակություն չունի մարդկային կյանքը, մարդկանց կարծիքը, մարդկանց բարոյական վերաբերմունքը, և ընդհանրապես մարդը։

Ու ամենաահավորն այն է, որ պուտինյան արկածախնդրության աջակիցները, ենթարկվողներն ուղղակիորեն աջակցում են մարդկային ու մարդու ոչնչացման այս հրեշավոր գործողությունը՝ ճամարտակություններ անելով մարդու փրկության մասին։

Հիրավի Լավրովի ցինիկ մտքում ամփոփված է նման հակամարդկանց ողջ տրամաբանությունը․ պատերազմում ենք՝ պատերազմ թույլ չտալու համար»։