ԵՄ-ը համաձայնեցրել է Ռուսաստանի դեմ պատժամիջոցների չորրորդ փաթեթը

Եվրոմիությունը համաձայնեցրել է Ռուսաստանի դեմ պատժամիջոցների չորրորդ փաթեթը, հայտնել է ԵՄ խորհրդում նախագահող ֆրանսիական պատվիրակությունը։

Նշվում է, որ պատժամիջոցներն ուղղված են Ուկրաինայում ռազմական գործողություններում ներգրավված անձանց ու կազմակերպությունների, ինչպես նաև Ռուսաստանի տնտեսության մի շարք ոլորտների դեմ։

Հայտարարության մեջ ասվում է նաև, որ ԵՄ-ը դիմել է Առևտրի համաշխարհային կազմակերպությանը՝ խնդրանքով՝ դադարեցնել Բելառուսի անդամակցության թեկնածության քննարկումը: Նաև կկասեցվի Ռուսաստանի՝ առավել բարենպաստ ազգի կարգավիճակը:

Ավելի վաղ հաղորդվել էր, որ ԵՄ-ն պատրաստվում է նոր պատժամիջոցներ կիրառել «Ռոսնեֆտի», «Տրանսնեֆտի» և «Գազպրոմ Նեֆտի» դեմ։ Նախնական տվյալներով՝ ընկերություններին սպառնում է ներդրումների արգելք, որը կսառեցնի ԵՄ ֆինանսավորումը բոլոր տեսակի հանածո վառելիքի արդյունահանման նախագծերի համար։