«Ամբարտավանությունը նույնիսկ պատերազմից հետո չի վերացել». Սուրեն Սուրենյանց

Քաղաքագետ Սուրեն Սուրենյանցի գրառումը. «Փաշինյանի ամբարտավանությունը՝ գրավո՞ր, թե՞ բանավոր...

«Պատիվ ունեմ» խմբակցությունը միանգամայն ճիշտ է. օրենսդրորեն պետք է կարգավորվի կառավարության հաշվետվողականությունը խորհրդարանին՝ արտաքին քաղաքականության և առկա իրավիճակի վերաբերյալ։

Խորհրդարանական համակարգում ԱԺ նման վերահսկողական գործառույթն աքսիոմատիկ ճշմարտություն է։

Ամբողջ խնդիրն այն է, որ այդ «աքսիոմը» Հայաստանում չի գործելու մի պարզ պատճառով։ Մեզանում չկա քաղաքական մշակույթ ու վարչապետի ամբարտավանությունը նրան թույլ է տալիս ասել, թե «ինչ պետք ա, այն էլ բանակցում ենք»: Այդ ամբարտավանությունը նույնիսկ պատերազմից հետո չի վերացել, ինչի ապացույցն է նաև այն, որ իշխանության ներկայացուցիչներն այսօր չէին մասնակցում խորհրդարանական լսումներին։

Եթե նույնիսկ ԱԺ կանոնակարգում հրաշքով ընդդիմության առաջարկած փոփոխությունները տեղ գտնեն, ապա միևնույն է՝ Փաշինյանն ու նրա թիմն առաջնորդվելու են «ինչ պետք ա, այն էլ բանսկցում ենք» արատավոր սկզբունքով։

Տարբերությունն այն է լինելու, որ օրենքի փոփոխությունից հետո Փաշինյանի ամբարտավան պատասխանը ոչ թե բանավոր է լինելու, այլ գրավոր։

Օրենքով կառավարության նկատմամբ վերահսկողություն սահմանել պետք է, բայց այդ ինստիտուտը կգործի, եթե քաղաքական մշակույթ փոխվի»։