Արմեն Գևորգյանի պաշտպանը լքեց դատական նիստերի դահլիճը

Այսօր՝ Ռոբերտ Քոչարյանի և Արմեն Գևորգյանի գործով դատական նիստին, դատավոր Աննա Դանիբեկյանը հայտարարեց, որ անցնում են ապացույցների հետազոտման կարգի սահմանմանը։

«Հայաստան» խմբակցության պատգամավոր Արմեն Գևորգյանի պաշտպան Լուսինե Սահակյանը, դիմելով դատարանին, ասաց․ «Դուք ճշտեցի՞ք իմ պաշտպանյալից՝ մեղադրանքը իրեն պարզ է, թե ոչ, ճշտեցի՞ք Արմեն Գևորգյանի դիրքորոշումը՝ առաջադրված մեղադրանքի կապակցությամբ»։

Դանիբեկյանը հորդորեց Սահակյանին ցածր խոսել։

«Ես փորձում եմ բարձր խոսել, միգուցե իմ կամ Արմեն Գևորգյանի խոսքը լսելի չէ, դրա համար եք դուք միանգամից անցնում այնպիսի փուլի, որին անցնելու իրավունք չունեք»,- ասաց պաշտպանը։

Սահակյանի խոսքով՝ խախտվում են իր պաշտպանյալի իրավունքները։ Նա բոյկոտեց դատական նիստը և հեռացավ դահլիճից։ Դատավորը հայտարարեց, որ առանց դատարանի թույլտվության դատական նիստերի դահլիճը լքելու համար Լուսինե Սահակյանի նկատմամբ դատական սանկցիա կկիրառվի։

Դատարանը հեռացավ խորհրդակցական սենյակ: