«Ինչքան շատ փորձեք արդարանալ անկարողությամբ, այդքան ավելի շատ եք թուլանալու»․ Տարոն Սիմոնյան

Իրավաբան, ԱԺ նախկին պատգամավոր Տարոն Սիմոնյանի գրառումը․ «Խաղաղասիրությունը հաղթողի մենաշնորհն է։
Արդեն նյարդայնացնում են այնպիսի հարցերը, թե «ախր մենք ինչպե՞ս կարող ենք», «արդյո՞ք պատրաստ ենք նոր պատերազմի» և այլն ...
Մի՛ մոռացեք, որ մենք քաղաքակրթական առումով ապրում ենք Արևելքում։
Ամենակարևոր բանը, որ չի ներվում այստեղ, թուլությունն է ու սեփական արժանապատվությունը չպաշտպանելը։
Այստեղ կա՛մ ապրում են արժանապատիվ ձևով, կա՛մ չեն ապրում։ Մեջտեղում տարբերակ չկա։
Ինչքան շատ փորձեք արդարանալ անկարողությամբ, այդքան ավելի շատ եք թուլանալու ու զրկվելու արժանապատվությունից։ Տակը մնալու է միայն ամեն կերպ ապրելու ամոթալի ցանկությունը, որ հատուկ է նաև անգիտակից օրգանիզմներին։
Ասել եմ ու կասեմ, որ ԿԱՐՈՂ ԵՆՔ և՛ ուշքի գալ, և՛ ոտքի կանգնել, և՛ դատապարտել տգիտությունն, թուլակամությունն ու հանցավորությունը, և՛ նորմալ կազմակերպել մեր պետական ու քաղաքական կյանքը, և՛ վերականգնել արժանապատվությունը, որովհետև ուրիշ տարբերակ չկա։
Պարզապես սկզբից պետք է սկսենք, որովհետև մեր տնտեսական, քաղաքական, իրավական, մշակութային, բարոյական բոլոր ձախողումները գալիս են գաղափարական հիմքերի բացակայությունից կամ ոչ լիարժեք լինելուց։
Մնացածները դրա հետևանքն են ...
Հ.Գ. Արցախի բռնազավթված տարածքներն էլ ազատագրվելու են, ու Հայաստանի Հանրապետության Անկախության հռչակագրի Միավորման գաղափարը կյանքի է կոչվելու»։