«Այստեղ լրջագույն խորհելու առիթ ունեն թե՛ սփյուռքյան կառույցները, թե՛ Հայաստանը». Ա. Բաբաջանյան

ԱԺ նախկին պատգամավոր Արման Բաբաջանյանի գրառումը. «44-օրյա պատերազմի հետևանքով օկուպացված Շուշիում տեղի է ունենում այսպես կոչված աշխարհի ադրբեջանցիների համաժողովը: Ակնհայտ է, որ աշխարհի տարբեր երկրների հասարակական-քաղաքական կյանքի համակարգեր ներթափանցած, հասարակական, քաղաքական, անգամ բիզնես համակարգեր ներխուժած ադրբեջանական սփյուռքը ժամանակի ընթացքում չեզոքացնելու է այն համեմատական առավելությունը, որ ունեին Հայաստանն ու Արցախը՝ «ի դեմս» հայկական սփյուռքի: Առավել ևս, որ հայկական սփյուռքն այդ իմաստով, պատերազմից ի վեր, գտնվում է «ազատ անկման» կամ «ինքնաչեզոքացման» ռեժիմում, շարունակելով մեծ հաշվով գտնվել այն կառուցվածքային, գաղափարական և մոդելային ձևաչափերում, որոնցում էր վերջին 40-50 տարիներին:
Այդ ժամանակաշրջանում արձանագրվում էին արդյունքներ, եթե անգամ դրանց մի մասը հարաբերական: Արդյունքներ անշուշտ այսօր էլ կան, սակայն փոխվում է ժամանակը, փոխվում է աշխարհը, և արդյունքը, որ 20, 30 կամ 50 տարի առաջ ուներ իքս կշիռ, նոր աշխարհի համեմատ տեսակարար իմաստով էապես կորցնում է իր կշիռը, որովհետև չի բավարարում այդ նոր աշխարհի, նոր ու խորքային փոփոխությունների պահանջին: Եվ այստեղ լրջագույն խորհելու առիթ ունեն թե՛ սփյուռքյան կառույցները, թե՛ Հայաստանը»: