«Նիկոլ Փաշինյանը փորձում է ժամանակ շահել». Հակոբ Հակոբյան

ԱՀ ԱՆ կից միջգերատեսչական դատահոգեբուժական հանձնաժողովի նախագահ Հակոբ Հակոբյանը ֆեյսբուքյան իր էջում գրել է․ «Արդեն տևական ժամանակ է՝ հասարակությունը պահանջում է Նիկոլ Փաշինյանի հրաժարականը: ՀՀ իշխանությունը, կամ ավելի ճիշտ Նիկոլ Փաշինյանը, փորձում է ժամանակ շահել, քայլ չի անում, քանի որ շատ լավ հասկանում է, որ հայտնվել է մի վիճակում, երբ ցանկացած քայլ տանում է պարտության: Այսօր Հայաստանում ֆանտաստիկ իրավիճակ է, երբ գունավոր հեղափոխությունից 4 տարի անց իրական ազգային ուժերն իրականացնում են հեղափոխություն: Այս երևույթի դեմ հակազդելու համար դեռևս գունավոր հեղափոխություն նախագծողները չունեն դեղատոմս: Նրանք շատ լավ հասկանում են, որ անտարբերության տալը, չնկատելը բերելու է հեղափոխական շարքերի մեծացմանը, քանզի մարդիկ դրա մեջ տեսնելու են իշխանության թուլացում:

Առանց լեգիտիմ հիմքի բիրտ ուժի կիրառումը բերելու է հասարակության մեջ ցասման մեծացման, որն էլ իր հերթին նույնպես մեծացնելու է հեղափոխական շարքերը: Ինչ է մնում իշխանություններին՝ գնալ սադրանքների, որը կընձեռնի լեգիտիմ հնարավորություն ուժ կիրառելու համար: Ընդ որում՝ դրանք հնարավոր է իրականացնեն ինչպես երթերի ժամանակ, ներկայանալով որպես ընդդիմադիր ցուցարարներ ու սադրելով ոստիկաններին, այնպես էլ բուն հանրահավաքների ժամանակ: Իհարկե, ամենաչհաջողվածն ախուրյանցի Անոն էր: Այսպիսով Հայաստանի իշխանությունն արդեն իսկ դարձել է սպառնալիք և՛ Հայաստանի, և՛ Արցախի անվտանգությանը: Հայաստանի Հանրապետության իշխանության քաղաքականությունը փաստորեն պարտված է ոչ միայն արտաքին բնագավառում, այլև պարտված է ներքին կյանքում: Նման իշխանությունը վտանգում է մեր անվտանգությունը, վտանգում է մեր կյանքը: Եվ ուրեմն՝ Հայաստան, ոտքի՛, Արցախ, ոտքի՛, հայ ազգ, ոտքի՛»: