«Որքա՞ն հնարավոր է ապրել «Թուրքիան ոչնչանա՝ լավ կլինի», «Ռուսաստանը փլուզվի՝ լավ կլինի» բանաձևերով». Հակոբ Բադալյան

Քաղաքական մեկնաբան Հակոբ Բադալյանի գրառումը. «Լավ, որքան կարող է հայկական ելքի «փնտրտուքը» կառուցվել մի բանաձևով՝ Արևմուտքն ու որ է այս կամ այն կերպ կոչնչացնի Ռուսաստանը, և Հայաստանը կստանա ազատագրության, ինքնիշխանության, զարգացման մի չտեսնված հնարավորություն:
Տասնամյակներ շարունակ ռուսական կայսերական ռազմավարությունը հայ ժողովրդին կապել է «Թուրքիայի» «կործանման» գաղափարով, հիմա էլ որևէ այլ ռազմավարություն հայ ժողովրդին կապում է «Ռուսաստանի կործանման» գաղափարով:
Էդպես, մեր «կյանքի բանաձևը» դարձել է կամ Թուրքիայի, կամ Ռուսաստանի «փլուզումը» կամ «ոչնչացումը»: Իսկ եթե թե մեկը, թե մյուսը առնվազն չեն փլուզվում կամ ոչնչանում այնքան, որ գերուժեղ չլինեն մեր նկատմա՞մբ:
Աշխարհաքաղաքականության հարգելի մարգարեներ, էդ դեպքում հայ ժողովրդի հանդեպ ազնիվ կլինի տալ գոնե պլան Բ-ի որոշակի «բանաձև», էն դեպքի համար, երբ մեր հանդեպ այլևս բացարձակ անզորության աստիճան չեն «փլուզվում» կամ «ոչնչանում» Թուրքիան էլ, Ռուսաստանն էլ:
Որքա՞ն, կամ ի՞նչ որակով է հնարավոր ապրել՝ «Թուրքիան ոչնչանա՝ լավ կլինի», կամ՝ «Ռուսաստանը փլուզվի՝ լավ կլինի» բանաձևերով: Այդ բանաձևերը որևէ ուղղությունից մեզ կառավարելու, այլ ոչ թե ՄԵՐ ինքնակառավարվելու բանաձևերն են»: