«Կալանավորումը մեզանում միշտ է որպես մահակ օգտագործվել»․ իրավապաշտպան

Հասարակական գործիչ, իրավապաշտպան, հրապարակախոս Վարդան Հարությունյանը ֆեյսբուքյան իր էջում գրել է. «Մամուլից տեղեկացա, որ այսօր կալանավորվել է «Երկիր մեդիա» հեռուստաընկերության տնօրեն Բագրատ Եսայանը։ Քրեական գործը նրա նկատմամբ հարուցվել էր 1 տարի 8 ամիս առաջ։
Կալանավորումը որպես խափանման միջոց մեզանում միշտ է որպես մահակ օգտագործվել ու դիտարկվել որպես պատիժ։ Այնինչ, այն պետք է կիրառվի ամենածայրահեղ դեպքերում՝ երբ մեղադրյալը խոչնդոտում է նախաքննությանը, երբ կան հիմնավոր կասկածներ, որ կթաքնվի, երբ նրա ազատ լինելն այլոց համար է վտանգավոր։ Մի խոսքով՝ այն պետք է լինի խիստ պատճառաբանված։
Ըստ փաստաբանի՝ ողջ այս ընթացքում Եսայանը թաքնվելու կամ նախաքննությանը խոչնդոտելու ոչ մի քայլ չի կատարել։
Ուրեմն, ի՞նչ իմաստ ունի նրա կալանավորումը։ Եթե այն Բագրատ Եսայանին լռեցնելու կամ պատժելու միջոց է, ապա մենք ոչ մի տեղ էլ չենք գնացել։ Մենք մնացել ենք մեր անցյալում և սուտ են արդարադատության համակարգը բարեփոխելու մասին բոլոր ճռճռան ելույթները»։