«Նոր ճանապարհի կառուցումը աղետալի է լինելու ողջ Արցախի համար». Արմեն Բաղդասարյան

«Կարծում եմ՝ վարչապետի կարծիքը լրատվամիջոցների դժգոհությունների մասին անկեղծ չէր, որովհետև այստեղ խնդիրն այն էր, որ նա այս ձևաչափով հնարավորություն ուներ ֆիլտրել, մի կողմ դնել անցանկալի հարցերը»,- «Ազատություն» ռադիոկայանի եթերում ասել է քաղաքագետ Արմեն Բաղդասարյանը՝ նշելով, որ լրատվամիջոները ճիշտ են արել, որ բոյկոտել են:

«Օրինակի համար կարող եմ ասել, որ Լաչինի միջանցքի և նոր ճանապարհի մասին որևէ մեկը կարող էր հարցնել, թե 2020-ի նոյեմբերի 9-ի փաստաթղթում գրված է՝ նոր ճանապարհը պետք է լինի Լաչինի միջանցքում՝ Բերձորը շրջանցող, բայց այն Լաչինի միջանցքում չէ, բավականին հարավ է ընկել: Ինչպե՞ս է դա եղել, ինչո՞ւ է հակասում նոյեմբերի 9-ի փաստաթղթի պահանջներին և ամենակարևորը՝ արդյո՞ք այդ միջանցքով են անցնելո կոմունիկացիաները՝ գազամուղը, էլեկտրալարերը: Այդպիսի հարց չհնչեց, մինչդեռ եթե հնչեր, վարչապետը կդժվարանար պատասխաներ»,- նշեց քաղաքագետը։

Հարցին, թե արդյոք հնարավո՞ր էր խուսափել այս ամենից, Բաղդասարյանն ասաց. «Պիտի անկեղծ լինեմ և ասեմ, որ հնարավոր չէր խուսափել, բայց մենք սխալ ենք օգտագործել հետպատերազմյան ժամանակը: Կարելի էր կոմունիկացիաների հարցը նախապես քննարկել, կարգավորել, որովհետև աղետ է լինելու: Ակնհայտ են Ադրբեջանի հաջորդ քայլերը. նրանք փակելու են գազամուղը, հոսանքը, ասելու են՝ քանի որ սա ադրբեջանական տարածք է, իրենք են այդտեղ հոսանք ու գազ մատակարարելու և դրա դիմաց բնակչությունից պահանջելու են վճարել ադրբեջանական մանաթով: Սա լուրջ սոցիալական աղետ է լինելու Արցախի ողջ բնակչության համար»,- ընդգծեց քաղաքագետը: