«Պարզվում է` երեկ Պետրոս Ղազարյանն ինձ հրավիրել է Հանրայինի եթեր». Քրիստինե Վարդանյան

ԱԺ «Հայաստան» խմբակցության պատգամավոր Քրիստինե Վարդանյանի գրառումը․ «Պարզվում է՝ երեկ Պետրոս Ղազարյանն ինձ մի քանի անգամ հրավիրել է Հանրայինի եթեր: Բայց, չգիտես՝ ինչու, դա արել է իմ գրառումներից մեկը Հայկ Կոնջորյանի հետ քննարկելու ընթացքում:

Հանդիպել են երկրի գլխավոր հեռուստաընկերության կարևոր քաղաքական հաղորդման մեկնաբանը և իշխող ֆրակցիայի ղեկավարն ու սկսել քննարկել իմ գրառումը, որն իրականում մեջբերում էր Իշխան Սաղաթելյանի խոսքից և միմյանցից փորձել ճշտել՝ ինչ եմ նկատի ունեցել այդ գրառմամբ:

Զրույցի ընթացքում հարցազրուցավարը մի քանի անգամ հույս է հայտնել, որ ես կհամարձակվեմ գնալ Հանրայինի եթեր և պաշտպանել հանրայնորեն հնչեցրած տեսակետներս. կարծես երբևէ խուսափել եմ դա անելուց:

Ասելու առանձնապես շատ բան չկա. ընկեցիկության մրցավազքում Հայկ Կոնջորյանին հաղթելը, իհարկե, անհնար կլինի, չնայած իշխող ֆրակցիայի այլ ներկայացուցիչներ կարող են չդադարել փորձել: Դա թողնելով նրանց՝ իմ պարտքն եմ համարում ասել, որ ինչպես միշտ պատրաստ եմ նորից հնչեցնել, ասել և հատկապես հիմնականում Հանրային հեռուստաընկերություն դիտող մեր քաղաքացիներին որքան հարկավոր է ներկայացնել մեր տեսակետները»: