«Հայրենիքի յուրաքանչյուր հատվածի հայաթափման հետ մենք բազմակի թուլանում ենք»․ Վարդան Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրում է. «Հին հունական առասպել կա հսկա Անթեյոսի մասին, ով Լիբիայի տիրակալն էր, ծովերի աստված Պոսեյդոնի և երկրի աստվածուհի Գեայի որդին: Առասպելական ուժի տեր այդ դյուցազունը անպարտ էր բոլոր մենամարտերում, ոչ ոք չէր կարողանում հաղթել նրան, քանի որ կռվի ընթացքում, երբ ուժի պակաս էր զգում, հպվում էր մայր-հողին և վերականգնում ուժերը։
Պատմում են, որ Հերակլեսը մենամարտի ժամանակ մի քանի անգամ գետնին է զարկում Անթեյոսին, բայց Գեայի որդին դրանից ամեն անգամ ավելի էր զորեղանում: Ու Հերակլեսը գետնից պոկում, օդ է բարձրացնում ախոյանին և խեղդամահ անում:

Թշնամին մեզ հաղթելու այս եղանակն է ընտրել, պոկում է մեզ ուժ սնող հայրենի հողից: Հայրենազրկված հայը, հայությունը դատապարտված է խեղդամահ լինելու: Հայրենիքի յուրաքանչյուր հատվածի հայաթափման հետ մենք բազմակի թուլանում ենք՝ այդ անվիճարկելի ու դաժան իրղություն է: Հայապահպանության միակ ճանապարհը հայրենատիրությունն է, և մենք պարտավոր ենք հիմա մեկնարկել արդյունավետ և ուժեղ պետականաշինություն հայրենատիրության գաղափաբանության հիմքով, եթե ուզում ենք ապրել, եթե իրապես ուզում ենք ապագա ունենալ: Ու պետք չէ հղում անել, թե երկրի բնակչության մեծամասնությունը քաղաքական լյումպենն է, որովհետև ուժեղ և արդյունավետ պետություն կառուցողը որևէ պարագայում լյումպենը չէ, չի եղել և չի կարող լինել: Իշխանության հետ նույնացման խաբկանքից ներկայում ագրեսիվացած այդ զանգվածը մշտապես ծառա է ցանկացած իշխանության, իշխանավորի, հետևաբար, խնդիրը ամենևին նրանք չեն»։