«Փաշինյանի տարբերությունը նախորդներից նրանում է, որ պարազիտային շերտերը վերջնականապես կազմակերպեց որպես իշխող դասակարգ»․ Վ․ Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրում է. «Անկախության վերականգնումից ի վեր մեր բոլոր իշխանությունները՝ Լևոն Տեր-Պետրոսյանից մինչև Սերժ Սարգսյան, պայմանականորեն ասած արել են հնարավոր ամեն ինչ հայկական հասարակության ներսում պարազիտային խավերի ձևավորման ու աճի համար: Եվ հայկական հասարակությունը ինքնագաղութացվել է իր ներսում պատալոգիկ սոցիալական գործընթացների արդյունքում ձևավորված այդ պարազիտների կողմից: Փաշինյանի տարբերությունը իր նախորդներից թերևս կայանում է միայն նրանում, որ նա իր նախորդների օրոք և նրանց ջանքերով բազմացած պարազիտային շերտերը վերջնականապես կազմակերպեց որպես իշխող դասակարգ: Ակնկալել, որ երկիրը կարող է հաղթահարել և դուրս գալ համարյա երսուն տարի անընդհատ շարունակվող այս պերմանենտ ճգնաժամից առանց պարազիտային խավերին քաղաքականապես ճնշելու, առնվազն միամտություն է: Ակնկալել, որ այդ կարող են անել կամ կանեն Հայաստանի նախկին-ներկա, բոլշևիկ կամ նեոբոլշևիկ ղեկավարները, հաստատ ապուշություն է:
Իսկ հիվանդությունը, որ դիտարկում ենք մեր երկրում անկախությունը վերագտնելուց հետո, ունի հստակ բժշկական ախտորոշում՝ աուտոինտոկսիկացիա կամ ինքանթունավորում՝ օրգանիզմի թունավորումը իր ներսում առաջացած թունավոր նյութերի կողմից, որոնք գոյանում են նրա կենսական պրոցեսների կամ տարբեր հիվանդությունների ընթացքում։ Ինքնաթունավորոմը լինում է երեք ձևի, բայց բոլորի դեպքում բուժումը մեկն է՝ պատճառների վերացում, օրգանիզմից թունավոր նյութերը հեռացնող միջոցները ևս հայտնի են՝ միզամուղներ, քրտնաբերներ»։