«Պուտինի առաջարկի դեմ բողոքել է միայն Էրդողանը». Հակոբ Բադալյան

Քաղաքական մեկնաբան Հակոբ Բադալյանի գրառումը. «2020 թվականի հունվարին՝ Մոսկվայում, և փետրվարին՝ Իսրայելում, Պուտինը կրկնեց նույն կոչը՝ ՄԱԿ ԱԽ հնգյակին առաջարկում էր սկսել քննարկումներ նոր աշխարհակարգի շուրջ: Ոչ ոք, իհարկե, չասաց՝ այո՛, եկեք քննարկենք, բայց հինգից որևէ մեկից կարծես թե չի եղել սկզբունքային որևէ մերժում (ներողություն, եթե սխալվում եմ):

Պուտինի առաջարկի դեմ բողոքել է միայն Էրդողանը, ընդ որում՝ դրանից ավելի քան մեկ 1,5 տարի անց, Անգոլայի խորհրդարանի իր ելույթում: Նա հայտարարեց, թե աշխարհի ճակատագիրը չպետք է մնա «մի բուռ երկրների» ողորմածության: Նկատի ուներ ՄԱԿ ԱԽ մշտական անդամ հնգյակը:

Ինչո՞ւ Էրդողանը չդժգոհեց, այսպես ասած, «թարմ հետքով», 2020-ի ձմռանը, երբ Պուտինը բարձրաձայնել էր առաջարկը, այլ խոսեց միայն 2021 թվականին: Արդյո՞ք որովհետև այդ ժամանակ համոզվեց, որ առաջարկն ընդունված է, և «գործընթացը» սկսվում է, իսկ Թուրքիան՝ դուրս մնում:

Նկատենք՝ այդ ժամանակ սկսեցին ամերիկա-ռուսական մոտ վեց ամիս տևած պարբերական, բազմամակարդակ շփումները՝ սկսած Ժնևում Պուտին-Բայդեն դեմ առ դեմ հանդիպումից:

Եվ մի բան էլ: Որևէ մեկը գիտե՞ պատերազմից բացի աշխարհի ճակատագիր վճռող այլ «մեթոդ»՝ ի դժբախտություն համայն մարդկության:

Իսկ այդ դժբախտությունն ամբողջ խորությամբ պարփակում է Սպիտակ տուն այցից հետո հռչակավոր Vogue-ի շապկին հայտնված Ուկրաինայի առաջին տիկնոջ խոսքը, ոչ բառացի, իհարկե. շատ շատերը, շատ աստղեր անգամ կերազեն հայտնվել Vogue ամսագրին, բայց տա Աստված, որ դա չլինի պատերազմի բերումով»: