«Ինչն է միավորում Լևոն Տեր-Պետրոսյանին ու Նիկոլ Փաշինյանին». Անդրանիկ Թևանյան

ԱԺ «Հայաստան» խմբակցության պատգամավոր Անդրանիկ Թևանյանի գրառումը․ «Ինչն է միավորում թուրքերին, բոլշևիկներին, Լևոն Տեր-Պետրոսյանին ու Նիկոլ Փաշինյանին

Նիկոլ Փաշինյանի իշխանությունն արգելում է Սփյուռքի դաշնակցականներին մուտք գործել Հայաստանի Հանրապետություն։ Արդեն 3-րդ դեպքն է արձանագրվել։

Փաստորեն, սրանք Թուրքիայի հետ պայմանավորվում են երրորդ երկրների քաղաքացիների համար բացել սահմանները, բայց արգելում են մեր հայրենակիցներին հատել ՀՀ սահմանը, քանզի նրանք դեմ են նիկոլական իշխանությանը։

Դաշնակցականների դեմ 1890-ից հետո արգելք ու հետապնդում կիրառել ու կիրառում են 4-ը՝

1․ Թուրքիան՝ Աբդուլ Համիդ 2-րդից սկսած,

2. Բոլշևիկները,

3․ ՀՀՇ-ական իշխանությունը՝ Լևոն Տեր-Պետրոսյանի գլխավորությամբ,

4․ ՀՀՇ-ի ու ՀԱԿ-ի արտադրական թափոն հանդիսացող ՀՀ օրվա իշխանությունները՝ Նիկոլ Փաշինյանի գլխավորությամբ։

Դաշնակցության 132-ամյա պատմությունը հաշվի առնելով՝ այդ կառույցին կարելի է բազմաթիվ մեղադրանքներ ներկայացնել ու քննադատել բազմաթիվ սխալների համար, բայց կա մի բան, որի համեմատ ստորադասվում են բոլոր մեղադրանքներն ու սխալները։ Դա արամմանուկյանների միջոցով 1-ին հանրապետության ծնունդ ապահովելն է։

Դաշնակցականների դեմ պաթոլոգիկ ձևով կռիվ տվողները, գիտակցաբար կամ անգիտակցաբար, հենց սա՝ հանրապետության ծնունդը չեն ներում նրանց։

Երբ ՀՅԴ-ի դեմ կռիվ է տալիս Թուրքիան կամ բոլշևիկը, հասկանալի է։ Բայց երբ ՀՅԴ-ն հրամանագրով արգելում է (1994թ․) կամ ՀՅԴ-ականներին Հայաստան մուտքը փակում է (2022թ․) հայաստանյան իշխանությունը, ապա դա հակաանկախականություն է։ Ավելի ճիշտ՝ թրքաբոլշևիկություն»։