Ստեփանակերտյան ռեժիմն արագացնում է Աղավնոյի հայաթափումը. ԱԺԲ

324

Հինգշաբթի, 18 օգոստոսի, 2022 թ., 16:36

Ազգային-ժողովրդավարական բևեռի մամուլի ծառայությունը հայտնում է. «Աղավնո համայնքն այսօր զրկվել է կապի բոլոր միջոցներից. դադարեցվել է էլեկտրաէներգիայի մատակարարումը, չի գործում նաև հեռախոսային կապը, սակայն Աղավնոյին կից գտնվող հիդրոէլեկտրակայանը շարունակում է իր անխափան աշխատանքը: Ստեփանակերտյան ռեժիմն այսպիսով արագացնում է Աղավնոյի հայաթափումը:

Ինչպես հայտնի է, գյուղը լքելու համար Աղավնոյի բնակիչներին մինչև օգոստոսի 25-ը ժամանակ են տվել, այն դեպքում, երբ Բերձորի միջանցքի երթուղուն փոխարինող նոր՝ Տեղ-Կոռնիձոր 11.8 կմ երկարությամբ ճանապարհի շինարարությունն ավարտվելու է հաջորդ տարվա մայիսին, և ինչպես երեկ Երևանում Ռուսաստանի դեսպանության խորհրդական-դեսպանորդ Մաքսիմ Սելեզնյովը հայտարարեց՝ ռուս «խաղաղապահները» ոչ մի սանտիմետր չեն տեղաշարժվի Լաչինի գործող միջանցքից, քանի դեռ նոր ճանապարհը չի շահագործվել:

Սա նշանակում է, որ Աղավնոյի բնակիչները առնվազն մինչև մայիսը կարող են մնալ ու ապրել իրենց տներում:

Սակայն ստեփանակերտյան ռեժիմը, սեփական շահերից ելնելով, կատարում է Բաքվի ուղիղ պատվերը և շահագրգռված է, որ Աղավնոն, Բերձորն ու Սուսը հնարավորինս շուտ հայաթափվեն:

Իսկ ռուս-թուրքական տանդեմի սպասարկու հանդիսացող երևանյան ռեժիմն ընդհանրապես հրաժարվել է Բերձորից, Աղավնոյից ու Սուսից և հեռվից է հետևում զարգացումներին:

Բևեռի մամուլի ծառայությունն առաջիկայում ավելի մանրամասն կանդրադառնա այս թեմային»:

Աղբյուրը` Ազգային-ժողովրդավարական բևեռ