«Տնտեսության լիբերալ մոդելը հանգեցրել է սոցիալական բևեռացման ուռճացման»․ Գարեգին Պետրոսյան

«Այլընտրանք» ՀԿ համանախագահ, քաղաքագետ Գարեգին Պետրոսյանը ֆեյսբուքյան իր էջում գրել է. «Աշխարհը մեծ վերափոխումների շեմին է․․․
Աշխարհը փոխվում է, փոխվում է սրընթաց։ Փոփոխությունները կրում են որոշակի բովանդակություն, ունեն նկարագիր և տրամաբանություն։ Սեփական ապագայով մտահոգ պետություններում շուրջ մեկ տասնամյակ է, ինչ բարձր մակարդակի քաղաքական քննարկումներ ու բանավեճեր են ընթանում նման գործընթացներն ու միտումները վեր հանելու, լուծումներ որոնելու շուրջ, մեզ մոտ ապագայի հանդեպ, որպես կանոն, զրո պատասխանատվություն։ Անգամ բուհական և ակադեմիական հարթակներում անդրադարձը խնդրին կատարվում է հատվածական, մասնակի, երբեմն էլ նեղ սպասարկող քաղաքական շահադիտականությամբ։

Մեզանում հաճախ ներկայացվում է, որ մարդկությունն անվիճելիորեն հաղթահարել է նախորդ դարաշրջանների աղետներն ու դրանց հետևանքները և անշեղորեն շարժվում է առաջ։ Այնինչ, աշխարհը բովանդակային առումով գլորվել է հարյուր տարի հետ։ Այսօր աշխարհը, ինչպես նախորդ դարասկզբին, երբ նորից տպավորություն էր, որ պատերազմներն ու աղետեները մնացել են անցյալում, կանգնած է մեծ վերափոխումների շեմին, կանգնած է պատերազմների և հեղափոխությունների շեմին։

Վերափոխումները ներառում են 3 հիմնական ասպեկտներ՝ քաղաքաան, տնտեսական և սոցիալական։ Տնտեսության լիբերալ մոդելը հանգեցրել է սոցիալական բևեռացման ուռճացման։ Համաշխարհային տնտեսության դինամիկան վաղուց արտացոլվում է նրանում, որ գնալով հարուստներն ավելի են հարստանում, աղքատներն ընդհակառակը՝ ունեզրկվում։ Սա անխուսափելիորեն հարվածում է միջին դասին, որը Արևմուտքում հատկապես երկրորդ աշխարհամարտից հետո դարձել էր ժողովրդավարության սոցիալական հենքը և քաղաքական համակարգի կայունարար գործոնը։

Միջին դասի ունեզրկումը և քաղաքական կայունության խարխլումը պարարատ հող է ստեղծում պոպուլիստների և քաղաքական ծաղրածուների համար, ովքեր վարժեցված են խնդիրները շահարկելու, բայց անընդունակ են դրանց լուծումներ տալու հարցում։ Արևմուտքն այսօր կանգնած է նման իրավիճակի առաջ։ Եթե Արևելքում խնդիրը փորձում են լուծել կամային ուժեղ առաջնորդների միջոցով, ովքեր կարող են հարկ եղած դեպքում նույնիսկ պարտադրաբար իրակաանցնել սեփականության վերաբաշխում(Սի, Մոդի, Պուտին, Էրդողան), Արևմուտքում նման լիդերների ի հայտ գալը իր հետ կբերի ներքին միջպետական թմրեցված հակասությունների նոր սրացումներ։

Աշխարհը կարծես բախվել է նույն այն մարտահրավերներին, որի առաջ կանգնած էր մինչև Եվրոպական Մեծ պատերազմը (Առաջին աշխարհամարտը)՝ մի կողմից աշխարհակարգի վերաբաժանման պայքար՝ պատերազմների տեսքով, մյուս կողմից՝ ունեզուրկների ապստամբություններն ունևորների դեմ, որը դրսևորվելու է քաղաքական հեղափոխությունների տեսքով։

Գլոբալ կայությության հետագա վերականգնումը մեծ հաշվով պայմանավորված կլինի այսպես կոչված Կ․ Մարքսի երկրորդ գալստյամբ և աշխարհակարգի վերաձևավորման պայքարի ավարտին ի հայտ եկած տեխնոլոգիական նորարարարության որակով։
(Շարունակելի․․․)»։