Երկուշաբթի, 23 փետրվարի, 2026 թ.
|
Ստեփանակերտում`   +5 °C

«Իշխանության համար այս տարբերակը ցանկալի չէ, բայց դիմադրության ռեսուրսներ չունի». Սուրեն Սուրենյանց

«Իշխանության համար այս տարբերակը ցանկալի չէ, բայց դիմադրության ռեսուրսներ չունի». Սուրեն Սուրենյանց
239
Չորեքշաբթի, 24 օգոստոսի, 2022 թ., 10:12

Քաղաքագետ Սուրեն Սուրենյանցի գրառումը. «Մարդկային կյանքերը շատ թանկ են, որպեսզի օգտագործվեն՝ որպես ներքաղաքական դիվիդենտ

Անկախության հռչակագրի հերթական տարեդարձը Նիկոլ Փաշինյանն օգտագործեց՝ ուղերձում նկարագրելու համար այն անբարենպաստ համատեքստը, որում հայտնվել է Հայաստանը:

Սակայն հիմա հուզական խոսքերի, գեղարվեստական ձևակերպումների ժամանակը չէ: Հայաստանի իշխանությունը հասարակության հետ անկեղծ կոմունիկացիայի անհրաժեշտություն ունի: Դրա համար անհրաժեշտ է հրաժարվել պոպուլիզմից ու պաթոսից: Աղավնոյի ու Բերձորի հարցը որոշվել էր նոյեմբերի 9-ի փաստաթղթով, բայց Հայաստանի իշխանության քաղաքական համարձակությունը չհերիքեց հասարակության առերեսել իրականության հետ ու իրեն ներքաղաքական հարձակումներից ապահովագրելու համար՝ նա դարձյալ գնաց Բաքվի ագրեսիվ օրակարգը լեգիտիմացնելու ճանապարհով, ինչի համար վճարեցինք երկու հայորդիների կյանքով:

Հիմա՝ կոմունիկացիաների կամ, այսպես կոչված, միջանցքի թեման է: Հայաստանին կրկին ինչ-որ բան պարտադրվում է: Իհարկե, խոսքը, ըստ ամենայնի, ոչ թե էքստերիտորիալ միջանցքի, այլ, այսպես ասած, ֆունկցիոնալ կամ ռուսական միջանցքի մասին է:

Իշխանության համար այս տարբերակը ցանկալի չէ, բայց դիմադրության ռեսուրսներ չունի:

Տպավորություն ունեմ, որ իշխանությունն այդ հարցը դարձյալ ուզում է լուծել մեր որդիների հաշվին, որպեսզի մի կողմից, չհայտնվի ներքաղաքական հարձակումների կիզակետում, մյուս կողմից՝ արտաքին հարաբերություններում լեգիտիմացնի «դիմադրության» իմիտացիան:

Մի՛ վարվեք այդպես, անկեղծ խոսեք ժողովրդի հետ: Մարդկային կյանքերը շատ թանկ են, որպեսզի օգտագործվեն՝ որպես ներքաղաքական դիվիդենտ»:

Աղբյուրը`   Սուրեն Սուրենյանց