«Մինսկի խմբի համանախագահության ճակատագիրը որոշվում է ուկրաինական պատերազմում»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «Մինսկի խմբի համանախագահության ճակատագիրը որոշվում է ուկրաինական պատերազմում: Մի շարք անգամներ ասել եմ՝ եթե Ռուսաստանն ու Նահանգները գան այդ ձևաչափին վերադարձի նպատակահարմարության, Բաքուն շատ «խելոք» կգնա ու կսկսի աշխատել այդ ձևաչափի հետ:

Այսօր, սակայն, Ռուսաստանն ու ԱՄՆ աշխարհակարգի վերակերտման բարդ գործընթացում են և նրանց գոնե առայժմ պետք է համանախագահության անունը, բայց ոչ համանախագահությունն ինքնին: Ի դեպ, 2022 թվականի ապրիլի 19-ին Փաշինյան-Պուտին համատեղ հայտարարության 24-րդ կետում Մինսկի խմբի համանախագահության կարևորության մասին նշումը ամենևին Պուտինի լավությունը չէ Փաշինյանին:

Ըստ անհրաժեշտության՝ համանախագահությունը հիշատակել ու հիշատակելու են թե՛ Մոսկվան, թե՛ Վաշինգթոնը, յուրաքանչյուրն իր ձևով ու ոճով, և բնականաբար իր խնդիրների համար: Վաղը կարող են գալ որոշակի աշխատանքի անհրաժեշտության, կամ ընդհանրապես՝ ձևաչափի վերանայման անհրաժեշտության: Երևանն ու Բաքուն այդ հարցում չեն ունեցել և չեն ունենալու վճռորոշ ազդեցություն:

Ու քանի որ անկանխատեսելիության այդ միջավայրում ենք, այսօր Հայաստանի խնդիրն է՝ նախ առավելագույն արդյունավետությամբ գործել անմիջականորեն առկա երկու ձևաչափերում՝ Մոսկվայի և Բրյուսելի, և բացի այդ նույն առավելագույն արդյունավետության ձգտել Մինսկի խմբի համանախագահ երեք երկրների հետ երկկողմ հարաբերություններում:

Ի դեպ, համանախագահության աշխատանքով թերևս միակ անմիջական շահագրգռություն ունեցողն այս փուլում Ֆրանսիան է, քանի որ Փարիզն է, որ աչքի չի ընկնում այս ռեգիոնում խաղի գործիքների առատությամբ՝ ի տարբերություն Վաշինգթոնի և Մոսկվայի: Բայց, Փարիզն էլ համանախագահության ճակատագրի հարցում ունի զգալիորեն սահմանափակ ազդեցություն»: