«ՀՀ բարձրաստիճան պաշտոնյաները չեն այցելում Արցախ, որովհետև վախենում են արցախցիներից». Արմեն Պետրոսյան

Արցախի «Արդարություն» կուսակցության գործադիր մարմնի անդամ Արմեն Պետրոսյանը «Լայն համախմբում Արցախի շուրջ» թեմայով քննարկման ժամանակ ասել է, որ ՀՀ բարձրաստիճան շատ պաշտոնյաներ իրենց համար օտարել են Արցախը. կա՛մ վախենում, կա՛մ չեն ուզում այցելել: «Իմ կարծիքով կամ խորին համոզմամբ, ոչ թե վախենում են ադրբեջանցիներից, այլ հենց արցախցիների ցասումից, դրա համար էլ ներկա չեն գտնվում Արցախում»,- նշել է նա: Պետրոսյանը տեղեկացրել է, որ սկսել են ապակուսակցական նոր շարժում՝ «Հանուն Արցախի պաշտպանության»։ «Հիմա մենք գտնվում ենք նոկդաունի մեջ և ունենք երկու ճանապարհ՝ կա՛մ ուշքի գալ ու շարունակել պայքարը, կա՛մ նոկդաունը հասցնել նոկաուտի: Ինձ թվում է՝ Արցախի ժողովուրդը չի ուզում դադարեցնել պայքարն ու համակերպվել այս իրավիճակին, ուստի կարծում եմ՝ շարժմանը կմիանան հասարակության տարբեր շերտի քաղաքացիներ»,- հավելել է բանախոսը: