«Չպետք է մոռանալ, որ Փելոսին Հայաստան գալիս է ԱՄՆ, ոչ թե ՀՀ խնդիրները լուծելու համար». Հակոբ Բադալյան

Քաղաքական մեկնաբան Հակոբ Բադալյանի գրառումը. «Ցնծության ֆոնին դուր չի գա շատերին, բայց հարկ եմ համարում արտահայտվել. միանգամայն հասկանալի է, որ անվտանգության ծանր մարտահրավերների առաջ, դաշնակցային փուչիկներով շրջապատված հանրությունը կենսական թթվածին է դիտարկում այլ ամեն ինչ, բայց թերևս արժե հիշեցնել, որ Հայաստան գալիս է ոչ թե Փրկիչը, այլ ԱՄՆ Կոնգրեսի Ներկայացուցիչների պալատի խոսնակը: Ավելին, խոսնակը և նրա թիմը թերևս այդպես են նաև գնահատելու Հայաստանում հանրային-քաղաքական հասունության աստիճանը՝ այստեղ Փրկի՞չ են սպասում, թե՞ գործընկեր, որին ոչ միայն կարող են ողջունել, այլ նաև տալ հարցեր, ակնկալել պատասխաններ, ծավալել առարկայական, ռացիոնալ քաղաքական քննարկում: Ընդհանրապես, թե՛ անհատական, թե՛ հանրային մակարդակով մենք (այդ թվում՝ առաջինը ես) պետք է հասունանանք, և հասունանալով հասկանանք, որ համաշխարհային քաղաքականության դերակատարներն ամենից առաջ չափում են դիմացինի ռացիոնալությունը, քաղաքական լրջմտությունը, հետո միայն լոյալությունը: Եվ ավելին, հաճախ սերտ և կառուցողական գործընկերություն ու հարաբերություն ստացվում է անգամ առանց «լոյալության բաղադրիչի, երբ ակնառու է դառնում դիմացինի լրջմտությունը:

Ինչո՞ւ, որովհետև առանց ռացիոնալ, լրջմիտ քաղաքական պատկերացումների, հեղհեղուկ է որևէ կարգի «լոյալություն», ու երբեմն նաև՝ ավելորդ ու անցանկալի բեռ:

Նենսի Փելոսիի այցն անշուշտ շատ կարևոր է, և պետք է կարողանանք այն դարձնել հայ-ամերիկյան հարաբերության սերտացման ու առարկայացման էական հանգրվան: Բայց չպետք է մոռանալ, որ Փելոսին Հայաստան գալիս է ԱՄՆ, ոչ թե Հայաստանի խնդիրները լուծելու համար: Այդ համատեքստում նա անշուշտ կարող է օգտակար լինել նաև Հայաստանի խնդիրների լուծման հարցում:

Բայց, հենց այդտեղ է, որ օգտակարությունն էապես կախված է մեր հասունությունից և քաղաքական լրջմտությունից: Իսկ դա նշանակում է ոչ միայն ցնծալ աննախադեպ, և իսկապես ողջունելի ու կարևոր այցի առնչությամբ, այլ նաև գիտակցել, թե մեզ համար ինչ ռիսկեր կարող է պարունակել այցը, ռիսկեր, որոնք ինչքան էլ չհնչի տարօրինակ, ԱՄՆ համար, կամ նվազագույնը դեմոկրատական իշխանության համար կարող են դիտարկվել հնարավորություն»: