«Սրա մասին պետք է խոսել Փելոսիի հետ». Անի Սամսոնյան

Նախկին պատգամավոր Անի Սամսոնյանը ֆեյսբուքյան իր էջում գրում է. «ԱՄՆ Ներկայացուցիչների պալատի խոսնակ Նենսի Փելոսին վաղը գալիս է Հայաստան։ Սա լավ առիթ է ԱՄՆ-ում քաղաքական կշիռ ունեցող գործչի հետ քննարկելու 1992 թվականից ուժի մեջ մտած 907 բանաձևը, որն արգելում էր ամերիկյան կառավարությանն օգնություն տրամադրել Ադրբեջանի կառավարությանը, եթե վերջինս քայլեր չի ձեռնարկում Հայաստանի և Լեռնային Ղարաբաղի դեմ շրջափակումն ու հարձակումները դադարեցնելու համար։ 2002թ․ ԱՄՆ Կոնգրեսը բանաձևը լրամշակմամբ հնարավորություն տվեց կառավարությանն ահաբեկչության դեմ պայքարի շրջանակներում տրամադրել ռազմական օգնություն։ Եվ առ այսօր այդ լրամշակումը հնարավորություն է տալիս ԱՄՆ-ին ամեն տարի Ադրբեջանին տրամադրել այդ օգնությունը։ ԱՄՆ նախագահ Բայդենը մինչև պաշտոնն ստանձնելը 2020թ․ հոկտեմբերի 14-ին հայտարարել էր, թե «Միացյալ Նահանգները պետք է ամբողջությամբ իրականացնի և չհրաժարվի «Ազատության աջակցության ակտի» 907-րդ հոդվածի պահանջներից և դադարեցնի ռազմական տեխնիկայի հոսքը դեպի Ադրբեջան»: Սակայն Բայդենն իր դիրքորոշումից հրաժարվեց 2021թ․ ապրիլի 23-ին։

Այսպիսով ԱՄՆ-ից ահաբեկչության դեմ պայքարի համար ռազմական օգնություն ստացող Ադրբեջանը 2020-ին հարձակվեց Արցախի վրա և իրագործեց պատերազմական հանցագործություններ, իսկ այժմ հարձակվել է ՀՀ սուվերեն տարածքի վրա՝ իրականացնելով պատերազմական հանցագործություններ։

Պետք է նշել, որ Ադրբեջանը երկու տարի առաջ տեղի ունեցած պատերազմից հետո և այսօր կորցրել է իր զինուժի զգալի մասը և բոլոր այն երկրները, որոնք ռազմական աջակցություն են ցուցաբերում վերջինիս և օգնում համալրել սպառազինության կորուստները, ուղղակիորեն օգնում են ագրեսորին և պատերազմական հանցագործին։

Սրա մասին պետք է խոսել Փելոսիի հետ, եթե ԱՄՆ-ը շահագրգռված է Հայաստանին աջակցելու համար գործուն քայլեր ձեռնարկել»։