Ուրբաթ, 22 սեպտեմբերի, 2023 թ.
|
Ստեփանակերտում`   +15 °C

«Զինադադարը չափազանց փխրուն է». Մարուքյանի հարցազրույցը՝ Հունաստանի «ERT» հեռուստաալիքին

«Զինադադարը չափազանց փխրուն է». Մարուքյանի հարցազրույցը՝ Հունաստանի «ERT» հեռուստաալիքին
176
Երկուշաբթի, 19 սեպտեմբերի, 2022 թ., 11:41

ՀՀ հատուկ հանձնարարություններով դեսպան Էդմոն Մարուքյանը հարցազրույց է տվել Հունաստանի «ERT» հանրային հեռուստաալիքին:

Լրագրող- Մենք ականատես եղանք Ադրբեջանի և Հայաստանի միջև նոր ռազմական գործողությունների։ Ի՞նչն էր այս նոր բախման դրդապատճառը:

Դեսպան Մարուքյան- Այն ոչ մի կապ չունի Լեռնային Ղարաբաղի հետ, այլ բացահայտ ներխուժում է Հայաստանի Հանրապետություն և ագրեսիվ գործողություն է Հայաստանի ինքնիշխանության դեմ: Ես կարող եմ ձեզ ասել, որ Հայաստանի մոտ 40 կիլոմետրը հայտնվել է օկուպացիայի մեջ, և այժմ այդ տարածքը ընդարձակվել է՝ ընդլայնվելով դեպի Հայաստանի այլ տարածքներ։

Լրագրող- Թուրքիան, սակայն, պնդում և մեղադրում է, որ այս տարի Հայաստանն է սկսել պատերազմը։ Ո՞րն է Ձեր պատասխանը։

Դեսպան Մարուքյան- Դա իսկապես ծիծաղելի է։ ԱՄՆ-ը և Ռուսաստանը տիրապետում են ողջ տեղեկատվությանը առ այն, որ Ադրբեջանն է հարձակվել, որ Ադրբեջանն է հարձակվողը, և որ Հայաստանը կապ չունի դրա հետ։ Սա միանգամայն չպատճառաբանված հարձակում է։

Լրագրող- Որքանո՞վ է փխրուն Ադրբեջանի և Հայաստանի միջև զինադադարը: Նաև որքանո՞վ է փխրուն իրավիճակը՝ Հայաստանի կառավարության հետ կապված։

Դեսպան Մարուքյան- Զինադադարը չափազանց փխրուն է, և ռազմական գործողություններ կարող են վերսկսվել ցանկացած պահի և շարունակվել։

Լրագրող- Պատրա՞ստ եք Ադրբեջանի հետ խաղաղ գործընթաց սկսելու՝ իմանալով, որ Թուրքիան նրանց կողքին է։

Դեսպան Մարուքյան- Նրանք պնդում են, որ մեկ ազգ՝ երկու պետություն են: Թուրքիայի նախագահի պնդումները բացարձակապես անհիմն են: Նրանք տիրապետում են տեղեկատվությանը և քաջատեղյակ են, որ առաջինը հարձակվել է Ադրբեջանը, սակայն սատարում են Ադրբեջանին՝ տրամադրելով տեղեկատվություն, անօդաչու թռչող սարքեր, հրահանգիչներ. բոլոր առկա միջոցներով աջակցում են Ադրբեջանի ագրեսիային։ Թուրքիան կրում է պատասխանատվության մեծ մասը, և պետք է աշխատանք տարվի դրա շուրջ:

Լրագրող- ԱՄՆ-ի Ներկայացուցիչների պալատի նախագահ տիկին Նենսի Փելոսին այս հանգստյան օրերին կայցելի Հայաստան։ Որո՞նք են ձեր ակնկալիքներն ԱՄՆ-ից:

Դեսպան Մարուքյան- Նենսի Փելոսին կայցելի ժողովրդավարական Հայաստան: Անշուշտ, ակնկալում ենք միջազգային հանրության աջակցությունը: Ակնկալում ենք Միացյալ Նահանգների, Ֆրանսիայի, Ռուսաստանի, ՄԱԿ-ի բոլոր մշտական անդամների աջակցությունը՝ միջազգային իրավունքի այս բացահայտ խախտման դեմ։ ԱՄՆ-ը կարող են կիրառել ազդեցիկ միջոցներ, ճնշում գործադրել՝ հասկացնելով Ադրբեջանին, որ սա անընդունելի է։

Լրագրող- Որքանո՞վ եք Դուք լավատես, որ Ռուսաստանն իրականում կմիջամտի և կհաշտեցնի երկու երկրներին, այն դեպքում, երբ Ուկրաինայում արդեն իսկ կա բաց ճակատ, և միևնույն ժամանակ Ռուսաստանը և Թուրքիան շատ մոտ են միմյանց:

Դեսպան Մարուքյան- Սա բարդ իրավիճակ է, և Ադրբեջանի հարձակումը կարող է ինչ-որ կերպ կապված լինել Ուկրաինայում տիրող իրավիճակի հետ։ Դուք ինձ հարցնում եք Ռուսաստանի մասին, որի հետ մենք ունենք ռազմավարական գործընկերություն։ Մենք բազմաթիվ երկկողմանի պայմանագրեր ունենք։

Լրագրող- Դուք միանգամայն վստա՞հ եք, որ Ռուսաստանը շարունակում է մնալ ձեր դաշնակիցը։

Դեսպան Մարուքյան- Խոսքը հստակ պարտավորությունների մասին է։