«Աշխարհն արդեն Սարգսյան Սերժի ժամանակների աշխարհը չէ». Կարեն Հեքիմյան

183

Երկուշաբթի, 10 հոկտեմբերի, 2022 թ., 17:54

«Քաղաքացու իրավունքների պաշտպան» ՀԿ նախագահ Կարեն Հեքիմյանի գրառումը. «Ե՛վ Արևմուտք, և՛ Ռուսաստան: «Ե՛վ, Ե՛վ»-ը Հայաստան մտավ Սարգսյան Սերժի օրոք և կարողացավ դիմանալ շուրջ 10 տարի: Փաշինյան Նիկոլը փորձեց ընդօրինակել իրավանախորդին, սակայն չհաջողեց, քանզի կոմպլեմենտարիզմը լուրջ և բոլորի խելքի բանը չէ: Բացի դրանից՝ աշխարհն արդեն Սարգսյան Սերժի ժամանակների աշխարհը չէ: Այսօր, արդեն անգամ Թուրքիան և Չինաստանը չեն կարող «Ե՛վ, Ե՛վ»-ի մեջ մնալ: Եվ, ըստ այդմ, հաշվի առնելով օբյեկտիվությունն ու սուբյեկտիվությունը, կարելի է պնդել, որ հայկական կոմպլեմենտարիզմն իրեն սպառել է: Դա տրամաբանական է նաև այն տեսանկյունից, որ հարևանների հետ կոնֆլիկտ ունեցող պետության համար այս պահին չի կարող գործել աշխարհաքաղաքական «Ե՛վ, Ե՛վ»-ը: Աշխարհը գնում է դեպի «Կա՛մ, Կա՛մ»:
Ըստ երևույթին, մեզանից էլ է պահանջվում «Կա՛մ, Կա՛մ»-ը: Օրվա իշխանությունների կողմից «Կա՛մ, Կա՛մ»-ի անհարկի ձգձգումը, ի վերջո, ողբերգության է հանգեցնելու:
Ի դեպ, «Կա՛մ, Կա՛մ»-ը նաև Արցախին է վերաբերվում, քանզի վերջինից՝ Հայաստանի հրաժարվելու պարագայում, այն դե ֆակտո դառնում է «օդում կախված» միավոր:
Ինչևէ: Այս բարդ իրավիճակի հանգուցալուծումը «Կա՛մ, Կա՛մ»-ի մեջ է:
Իսկ ի՞նչ կլինի «Կա՛մ, Կա՛մ»-ից հետո: Դա էլ հետո կերևա: Միգուցե նաև «Ե՛վ, Եվ»-ին վերադարձ լինի»:

Աղբյուրը` Կարեն Հեքիմյան