«Հիմա մոդայիկ է դարձել, որ տեղյակ-անտեղյակ պնդում են, թե երեսուն տարի ոչ մի բան չի արվել»․ Արցախի նախկին արտգործնախարար

Արցախի նախկին արտգործնախարար Կարեն Միրզոյանը 24TV-ին տված հարցազրույցում խոսելով Պրահայում քառակողմ հանդիպման ու տարածված հայտարարության մասին, ասել է հետևյալը․ «Հերթական անգամ Ադրբեջանին հաջողվեց առաջ տանել իր պահանջները, իր բանակցային դիրքերը... ՀՀ իշխանությունները պնդում էին, որ «Զանգեզուրի միջանցք»-ը բացառվում է, թույլ չի տա իր սուվերենության հաշվին որևէ տրանսպորտային հաղորդակցություն, բայց հաջորդ օրը վարչապետը ստիպված եղավ թվիթերյան գրառմամբ հաստատել, որ հայկական կողմը տանուլ է տվել այդ կետում։

Առանց Արցախի ՀՀ-ն նույնպես վտանգված է, հիշեցնեմ, որ այն բոլոր տարածքները, որտեղ այսօր դիրքային կռիվներ են տեղի ունենում, ժամանակին հարևան էին Արցախին, և այնտեղ երեսուն տարուց ավել որևէ գործողություն, վտանգ չի եղել»։

Միրզոյանը նաև անդրադարձել է վարչապետ Փաշինյանին հասած բանակցային ժառանգությանը․ «Հիմա մոդայիկ է դարձել, որ մարդիկ տեղյակ-անտեղյակ պնդում են, թե երեսուն տարի ոչ մի բան չի արվել, և այս խեղճ իշխանությունները ստիպված զրոյական մակարդակից են սկսել, դրա համար այսպիսի վիճակում ենք, սակայն այնուամենայնիվ, ես պատրաստ եմ վիճել, պնդել, որ երեսուն տարվա ընթացքում բավականաչափ աշխատանք է տարվել, բավականաչափ լուրջ մշակումներ են եղել, ձեռքբերումներ, որոնք թույլ էին տալիս հայ բանակցողին հանդես գալ բավականին ամուր և նույնիսկ նախահարձակ դիրքերից»։