«Հայաստանն ու Արցախը միևնույն անվտանգային գոտին են, նրանք դա չեն հասկանում». Դավիթ Գալստյան

Արցախի ԱԺ «Արդարություն» խմբակցության ղեկավար Դավիթ Գալստյանը 24TV-ին տված հարցազրույցում խոսել է ՀՀ և ԼՂՀ իշխանությունների երկխոսության վերաբերյալ․ «Փաշինյանի ցանկացած հայտարարությունից հետո, կապված նոր կապիտուլյացիոն պայմանագրի հետ, որը հիմա անվանում է խաղաղության պայմանագիր, ամեն նման հայտարարությունից հետո Արցախում մտահոգություններ են առաջանում, ժողովուրդը ըմբոստանում է։ Նման հայտարարությունները դարձել են պարբերական. կա՛մ ԼՂՀ խորհրդարանից, կա՛մ Արայիկ Հարությունյանն ինքն է պատվիրակություն կազմում, գնում է բացատրություններ պահանջելու, սակայն խոսակցության ընթացքում լրիվ այլ բաներ են խոսում և խոստումներ են տալիս, իսկ գործնականում անում են ուղիղ հակառակը։ Այսինքն, երբ ԼՂՀ խորհրդարանական պատվիրակությունը սեպտեմբերի 14-15-ին ՀՀ-ում էր, նույն Ալեն Սիմոնյանը վստահեցնում էր, որ ՀՀ-ն Արցախի ժողովրդի որոշման կողքին կանգնելու է, մեզ մեղադրում էին, թե մենք ո՞նց ենք տենց բան մտածել, որ ՀՀ-ն կարող է հրաժարվել Արցախից, սակայն տեսնում ենք Փաշինյանի այն խայտառակ փաստաթուղթը, որը պատրաստվում է ստրագրել, որտեղ ոչ թե Արցախից հրաժարվում է, այլ ճանաչում է որպես Ադրբեջանի մաս և բառ անգամ չի խոսում ինքնորոշման մասին։ Հայաստանն ու Արցախը միևնույն անվտանգային գոտին են, նրանք դա չեն հասկանում»։

Գալստյանը տեղեկացրեց, որ իրենք օրերս այցելել են Հայաստան՝ հասկանալու ժողովրդի տրամադրությունը և ոչ պաշտոնական հանդիպումներ են ունեցել տարբեր պատգամավորների հետ։